VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20160222

500 ANOS - TINAN ATUS LIMA: Kapítulu 50 – Invasaun no okupasaun japonés iha Timor Portugés (1942-1945) (Parte daruak)

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

Kapítulu 50Invasaun no okupasaun japonés iha Timor Portugés (1942-1945) (Parte daruak)

Hahú fulan Fevereiru tinan 1942, forsa armada japonés, né’ebé kontrola tiha ona sidade Dili, hahú avansa ba foho. Iha loron 21 fulan ne’ebá, populasaun hosi Dili evakua ba Aileu; maibé iha fulan Marsu soldado japonês sira to’o iha vila ne’ebá; sira sei tau baze militar ida iha fulan Setembru. Iha Abril, liurai balu iha fronteira halo revolta hasoru governu portugés; Iha fulan ne’e aviaun hosi Austrália soe bomba ba sidade Dili no sobu Igreja Matriz; iha fulan Jullu, liurai Suro, Don Aleixo Corte Real husik vila Ainaro ba hela iha akampamentu iha foho Surulau. Iha fulan Agosto, milísia ka “colunas negras” hosi Timor Ocidental tama Timor Loro Sa’e hodi naok balada (kuda, karau no bibi), sunu uma no oho ema arbiru deit. Iha fulan Outubru soldados japonés ho “coluna negra” tama vila Ainaro. Sira oho amu lulik na’in rua: padre Norberto de Oliveira Barros no António Manuel Pires. Iha fulan ne’e duni japonés tama Oe-Cusse, no lori amo lulik Francisco António Durão Quintão no Norberto Augusto Parada ba hatama iha kampu kosentrasun Liquiçá.

Iha fulan Novembro 1942, soldado japonés “coluna negra” tama vila Manatuto; oho tiha administrador, sira liu vila Baucau. Iha fulan Dezembru, japonés tama vila Same. Iha loron 13 fulan ida ne’e, Administrador Apostólico Dioseze Dili, Monsenhor Jaime Garcia Goulart, hamutuk ho amo lulik na’in sanulu resin ida no madre kanosiana na’in sanulu resin tolu, sae ró liu ba Austrália.

Iha tinan 1943: japonês sira lori amo lulik António Manuel Serra no Júlio Augusto Ferreira, hosi Baucau ba Liquiçá. Iha ne’ebá, iha mos padre Carlos da Rocha Pereira no Alberto da Ressurreição Gonçalves, hamutuk ho malae no ema timor oan balu. Iha tinan ne’ebá mate iha ai laran amo lulik Francisco Madeira, superior missaun Hatolia no padre Abilio Caldas. Iha fulan Maio 1943, soldado japonés oho iha Hato-Udo liurai Dom Aleixo Corte Real, liurai oan Alexandre Sarmento no liurai Hato-Udo. Iha tempu ne’e, timor oan ida naran Lelo-Mau ohon liurai oan feto Dona Virgínia das Mercês Doutel Sarmento e Cárceres, ne’ebé sai hanesan mártir.

Tinan 1944: soldado japonês haree katak Igreja Matriz iha Dili sai hanesan sinal ida atu dada aviaun australianu hodi soe bomba ba Dili leten, sira tau dinamite iha uma Kreda boot ne’e, hodi sobu rahun tiha. Iha loron 10 fulan Jullu, japonés prende Eng. Canto do Resende, tenente Liberato no João Duarte, gerente Banco Nacional Ultramarino nian no aspirante José Santa, hodi lori ba illa (pulau) Alor. Eng. Canto do Resende mate iha Kalabahi iha loron 23 fulan Fevereiro 1944. Joponés sira prende Dom Jeremias Amaral, mate iha kadeia laran, iha Ossú.

Hahú fulan Fevereiro 1942 to’o fulan Agosto tinan 1945, se mak ukun iha Kolónia Timor Português, ema japonés. Maiske iha governador portugés, sira mak sai autoridade: sira halo sirkulasaun iha osan joponés iha rai laran; sira obriga timor oan koalia lian japonés no malaio; maibé sira mos loke estrada ka liuron barak, halo ponte no halo kampu avisauan iha Com no Fuiloro.

Haree ba sosiedade timor nian, iha divisaun boot: balu fo apoio ba soldadu austrilanu ne’e halo gerrilla iha foho;  balu serbisu hamutuk ho forsa japonês. Tanba Liurai no dato no povu serbiu hamutuk ho australianu, barak mak sai dadur, hetan tortura no mate iha kalabousuo ka kadeia japonês. Timor oan sira mos funu hasoru malu: odi malu, oho malu, naok no sobu sasan. Natar, to’os no plantasaun kafé ka nuu husik hotu. Ema barak halai ba subar iha fatuk kuak, foho leten, ai-laran (alas). Feto timor oan barak sai atan seksu (sexo) nian. Ema ne’e halibur  informasuan kona ba problema ne’e,  dehan katak ema feto na’in 270.


Dom Carlos Filipe Ximenes Belo
Premiu Nobel Paz 1996

Sem comentários:

Enviar um comentário

Nota: só um membro deste blogue pode publicar um comentário.