VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Artista Nia "Lian-Nonok" Ba Ukun-nain Sira  
   

domingo, 20 de maio de 2018

Diskursu PR Lu-OLo Restaurasaun Independensia 20/5/2018


DISKURSU HOSI SUA EXELÉNSIA FRANCISCO GUTERRES LÚ OLO
PREZIDENTE REPÚBLIKA DEMOKRÁTIKA TIMOR-LESTE
IHA OKAZIAUN ANIVERSÁRIU RESTAURASAUN INDEPENDÉNSIA BA DALA 16

Dili, 20 Maiu, 2018

Sua Exelénsia Prezidente Parlamentu Nasionál Aniceto Guterres,
Sua Exelénsia Primeiru Ministru Mari Alkatiri,
Sua Exelénsia Prezidente Tribunál Rekursu Juis Deolindo dos Santos,
Sua Exelénsia, Maun-Boot Kay Rala Xanana Gusmão, eis-komandante Falintil no eis-Prezidente RDTL,
Sua Exelénsia, Maun-Boot José Ramos-Horta, eis-Prezidente RDTL, 
Sua Exelénsia, Maun-Boot Taur Matan Ruak, eis-Prezidente RDTL,
Suas Exelénsias Deputadus no Deputadas Parlamentu Nasionál,
Suas Exelénsias Membrus Governu,
Suas Exelénsias membrus órgaun soberania RDTL nian hotu-hotu,
Sua Exelénsia Prokuradór Jerál Repúblika José Ximenes,
Suas Exelénsias Xefe Estadu-Maiór Jenerál Falintil-FDTL no xefias militares aas liu,
Exelentísimus reprezentantes hosi instituisaun aas liu Estadu nian,
Suas Exelénsias Embaixadores no membrus Korpu Diplomátiku no Konsulár ne'ebé akreditadu hosi Repúblika Demokrátika Timor-Leste, 
Reverendísimus Bispus no reprezentantes Konfisaun Relijioza sira-nian,
Distintu konvidadu sira, señoras no señores
Maubere no Buibere sira, maun-alin no inan-feton sira

Ha’u hakarak hato’o ha’u-nia saudasaun ba povu doben Timor-Leste. Ha’u sente orgullu boot ho responsabilidade ne'ebé mak povu fó mai ha’u, maski nakonu ho dezafius iha tinan ida ikus ne'e.

Ha’u nia hako’ak boot no obrigadu wain ba Ita-Boot sira ne’ebé ohin marka prezensa iha fatin ida-ne'e. Iha loron-boot ne'e ba Nasaun ida-ne'e, uluknanain ha’u hakarak saúda no agradese ita-nia povu, sidadaun hotu-hotu, feto no mane, ba ezemplu maturidade ne’ebé sira fó dala ida tan iha fulan hirak ikus ne’e, hodi hametin pás, estabilidade no demokrasia iha ita-nia rain.

Ha’u-nia hako’ak boot ba Timoroan sira hotu iha fatin ne’ebé de’it, iha rai-laran no namkari iha rai-li’ur. Ha’u-nia hanoin ho ita-nia maun-alin no inan-feton sira-ne’ebé serbisu iha rai-li’ur no hanoin tebes sira-nia família no ita-nia rain, liuliu iha loron-boot ida-ne’e.

Hafoin luta naruk ida ba libertasaun nasionál, Restaurasaun Independénsia sai loloos hanesan rekoñesimentu hosi komunidade internasionál ba identidade nasionál timoroan, ne’ebé hatudu ita-nia povu nia determinasaun no laran-metin. Iha kalan memoravel 20 Maiu 2002 nian, komunidade internasionál hakat mai Tasi Tolu hodi saúda ita-nia povu no fahe lisuk ita-nia sentimentu ne’e. Emosaun ne'ebé mosu iha kalan ne'ebá sei metin nafatin iha ha’u-nia fuan.

Fini nasionalista ne’ebé kuda hosi saudozu Nicolau no ninia maluk sira - balun sei moris hela - ikusmai fó fuan ne’ebé midar mai ita no ita-nia oan sira moris iha Timór nu’udar nasaun ne’ebé livre.

Loron 20 Maiu halo ita hanoin hikas fali no hatudu momoos ita-nia Nasaun nia kapasidade atu fó liman ba malu, reziste no manán.

Restaurasaun Independénsia hatudu momoos ita-nia Nasaun nia kapasidade atu halo ita-nia valores, tradisaun no lisan nakfila ba instrumentu hirak ne’ebé uza hodi halo sai realidade ita-nia mehi, no ita-nia bei’ala sira-nia mehi, atu harii futuru ida ne'ebé di’ak liután iha rain ida ne'ebé di’ak liután.

Ohin ita selebra Aniversáriu Restaurasaun Independénsia ba dala 16, hafoin ita-nia povu hatán tiha ba dezafiu foun ida, katak eleisaun antesipada. Durante prosesu tomak ne'e, ita-nia povu hato’o nia hakarak ho hakmatek, nune’e hametin demokrasia, estabilidade no pás, hanesan ha’u temi ona.

Ohin kompleta tinan ida ha’u toma pose nu’udar Prezidente Repúblika Demokrátika Timor-Leste hodi hala’o knaar ne’ebé povu fó fiar mai ha’u kaer. Tinan ne’e nakonu ho dezafius ba ita hotu-hotu.

Lakleur hafoin ha’u simu xefia Estadu nian, nasaun hasoru situasaun polítika foun ida ne’ebé hanetik ka hamosu obstákulu hasoru aprovasaun ba leis no instrumentu konstitusionál seluseluk ne’ebé importante tebetebes hodi bele ukun.

Ha’u enfrenta dezafiu foun ne’e, hodi foka ba preokupasaun fundamentál rua, no prioridade rua, mak hanesan: primeiru, halo tuir Konstituisaun RDTL no, segundu, halo tuir kompromisu sira-ne’ebé ha’u halo ba Nasaun hori-bainhira ha’u simu knaar xefia Estadu nian.

Ha’u hala’o konsultasaun ne'ebé kle’an ho sosiedade sivíl no tau konsiderasaun ba interese nasionál. Ha’u halo avaliasaun ba kondisaun estabilidade sosiál no estabilidade polítika iha Parlamentu ne’ebé nesesáriu hodi asegura kondisaun sira-ne’ebé presiza hodi lori ba oin ita-nia projetu nasionál atu dezenvolve nasaun no diversifika ekonomia nasionál.

Konstituisaun sai matadalan ba ha’u-nia reflesaun kona-ba kompromisu sira-ne’ebé mak ha’u foti hori-bainhira toma pose, atu:
- Sai garante ba unidade Estadu nian no karater unitáriu RDTL nian; no 
- Hala’o ha’u-nia knaar atu halibur povu tomak, sei la haree ba ema ida-idak ninia partidu, ninia estatutu sosiál no ekonómiku, relijiaun ka etnia;

Ne’e katak, ha’u-nia kompromisu atu sai hanesan Prezidente hotu-hotu nian no ba ema hotu.

Ha’u foti konkluzaun, tuir avaliasaun ne’ebé ha’u halo, katak presiza halo konsulta foun ho sidadaun sira hodi rezolve situasaun polítika no klarifika didi’ak sidadaun sira-nia vontade.

Klaru ke opsaun hodi bá eleisaun antesipada lori risku balun, tanba iha momentu ne'ebá la posivel atu hatene loloos eleitór sira sei hili oinsá loos.

Maibé, buka kondisaun hodi hametin estabilidade no pás hanesan devér ita hotu nian: sidadaun sira-nian, ulun-boot sira-nian no órgaun soberania hotu-hotu nian tuir kompeténsia ne'ebé sira iha.

Sidadaun sira hatán ba dezafiu ida-ne'e ho maturidade, espíritu toleránsia no vontade atu fó liman ba malu, hodi dame nia naran.

Durante preparasaun no realizasaun ba eleisaun antesipada, hahalok sidadaun sira-nian iha territóriu laran tomak, ne’ebé hatudu hakmatek no maturidade, hamorin Timor-Leste nia naran iha rejiaun no iha mundu.

Sidadaun timoroan sira sai ona hanesan ezemplu di’ak ida ba ema hotu-hotu, inklui ulun-boot sira, atu banati tuir - ohin-loron no aban-bainrua.

Hosi ha’u-nia parte nu’udar Xefe Estadu, hodi hala’o ha’u-nia kompeténsia sira, ha’u fó-hanoin hikas fali katak, iha ita-nia sistema konstitusionál, Prezidente Repúblika la’ós de’it símbolu Nasaun ida nian, maibé mós órgaun soberania ida ne’ebé kaer responsabilidade aas liu atu lori ita-nia rain ida-ne’e ba dalan estabilidade no garante sistema polítiku la’o ho di’ak.

Prosesu polítiku ne’ebé ita hala’o ho susesu maka prezente aniversáriu furak liu ne’ebé ita bele hasa’e ba Nasaun, iha momentu ne'ebé ita selebra tinan 16 ba loron boot Restaurasaun Independénsia.

Loron 20 Maiu, 2002, sei hela iha istória Nasaun nian ba nafatin nu’udar loron iha ne'ebé Timoroan sira-nia determinasaun no sakrifísiu manán - no pás manán.

Iha momentu ne’ebé ita hamutuk selebra Restaurasaun Independénsia, ha’u hakarak hato’o liafuan espesiál parabens ba membrus Parlamentu Nasionál hotu-hotu, ne’ebé mak eleitu iha loron 12 fulan-Maiu. Ha’u agradese no hako’ak mós deputadus no deputadas ne’ebé mak serbí nasaun iha Parlamentu Nasionál sesante durante tinan ida ikus ne’e.

Lori povu no Estadu nia naran, ha’u fó parabens mós ba Primeiru-Ministru no membrus VII Governu Konstitusionál nian hotu-hotu, ne’ebé ukun ita-nia rain ne'e ho rigorozu, kompetente no ezemplár durante períodu ida-ne’e, no lori administrasaun ba susesu, hanesan rekoñese hosi ita hotu, maski hasoru kondisaun ne’ebé susar tebetebes, la’ós de’it iha nivel polítiku maibé mós iha nivel orsamentál.

Exelénsias,

Oras ne'e Timor-Leste soi maioria ida atu ukun. Iha tempu badak nia laran ha’u espera atu sai sasin ba abertura Lejizlatura Dalimak Parlamentu Nasionál nian no, hafoin, fó pose ba VIII Governu Konstitusionál.

Aniversáriu Restaurasaun Independénsia konvida ita atu halo reflesaun kona-ba responsabilidade aas ne'ebé mosu hosi governu maioria ida. 

Governu serve ba saida? Governu ida ne'ebé hili tuir dalan demokrasia nian, ho responsabilidade sira-ne'ebé sidadaun sira tau iha ukun-na’in sira-nia liman, serve ba saida?

Sidadaun sira fó ba nasaun maioria ida atu ukun. Maibé maioria ne’e la signifika katak governu ida, governu ne'ebé de’it, bele halo tuir nia hakarak. Lae. Ukun ne'e katak hili polítika hirak ne'ebé adekuadu, implementa medida hirak ne’ebé di'ak hodi hatán ba nesesidade sira povu nian. Ukun ne'e katak tane aas interese sira povu no nasaun nian.

Maioria ne’ebé rezulta hosi eleisaun antesipada fasilita serbisu ukun nian. Maski nune’e, hodi hametin konfiansa iha demokrasia, ukun-na’in sira tenke halo tuir promesa sira-ne’ebé halo durante kampaña eleitorál.

Liutiha Restaurasaun Independénsia, Estadu nia prioridade mak haburas kondisaun ne’ebé di’ak liu posivel hodi hametin soberania nasionál.

Hodi haforsa soberania no hametin ita-nia nasaun, ita tenke dezenvolve lailais ita-nia rain ne'e, hadi’ak kondisaun moris no hasa’e moris-di’ak ba sidadaun hotu-hotu.

Hodi dehan ho liafuan seluk: Ukun ho susesu mak atinje rezultadu hirak ne’ebé pozitivu: Haburas nasaun no hadi’ak kondisaun moris ema hotu-hotu nian mak ukun ho susesu! 

Ida-ne'e mak pontu-xave hosi reflesaun ne'ebé ha’u propoin ba ita hotu.

Mauberes, buiberes.

Demokrasia la’ós de’it partisipasaun sidadaun sira-nian iha eleisaun. Ukun liuhosi dalan Demokrasia signifika mós haburas kondisaun ba sidadaun sira atu partisipa loroloron iha solusaun ba problema sira-ne’ebé mak afeta sira-nia moris, signifika mós promove povu nia partisipasaun iha prosesu definisaun no implementasaun ba prioridade sira dezenvolvimentu nian, iha nivel nasionál no lokál.

Bazeia ba kondisaun pás, estabilidade no klareza polítika ne'ebé mak ita-nia rain iha daudaun ne'e, ha’u fiar katak iha tinan lima oinmai hosi V Lejizlatura, ne’ebé lakleur sei hahú ho abertura parlamentu Nasionál foun, Timor-Leste tenke fó hakat foun hirak ne’ebé metin hodi hasa’e kualidade ekonomia nian, kualidade dezenvolvimentu nian, atu nune’e ita bele realiza Objetivus Dezenvolvimentu Sustentavel ne'ebé ita promete atu halo tuir iha Nasoins Unidas nia oin, hamutuk ho komunidade internasionál.

Objetivu estratéjiku sira ba dezenvolvimentu nasionál la muda tanba de’it troka tiha governu. Defeza no promosaun ba interese nasionál ezije diálogu, konsertasaun no partisipasaun sidadaun sira-nian ho ativu.

Hanesan libertasaun nasionál hanorin mai ita, durante luta tinan 24 nia laran, unidade povu nian no unidade entre povu no funu-na’in sira importante tebetebes hodi lori pás ba vitória no restaura Independénsia. Ohin loron, só ho mobilizasaun sidadaun sira-nian iha territóriu laran tomak, só ho unidade povu nian no serbisu hamutuk entre Estadu no sidadaun sira, mak ita bele atinje meta nasionál sira-ne’ebé determina ona. Liuliu:

- Hasa’e Edukasaun nasionál nia kualidade;
- Hasa’e kualidade hosi uma-kain timoroan ida-idak nia 
saúde;
- Hasa’e ita-nia ekonomia nia rendimentu;
- No kumpre ambisaun atu halo ita-nia rain nakfila ba nasaun ida ho rendimentu médiu iha tinan 5 to’o 10 oinmai, ho kondisaun moris ne'ebé di’ak liután ba ita hotu-hotu.

Kompromisu sira-ne’ebé mak ha’u foti hori-bainhira ha’u eleitu ba Xefe Estadu, fó valór no atensaun maka’as ba ambisaun nasionál hirak-ne’e. 
Hanesan ha’u temi iha momentu ha’u hetan pose, durante ha’u-nia mandatu ha’u sei uza instrumentu sira-ne'ebé Konstituisaun fó ba Prezidente Repúblika hodi

- defende inkluzaun sosiál no ekonómika ba Timoroan hotu-hotu, feto no mane, liuhosi defende no promove polítika hirak ne’ebé Estadu tenke halo ba Edukasaun, formasaun profisionál, saúde, uma, asesu ba bee moos, saneamentu báziku no kria kampu serbisu; 
- No sai fatór ida ne’ebé kaer metin estabilidade polítika, pás no dezenvolvimentu.
Mauberes no buiberes, maun-alin no inan-feton sira,

Atubele alkansa Timor-Leste nia objetivu nasionál sira, Estadu no sidadaun sira, ita hotu, tenke haraik-an, onestu, laran-moos no serbisu hamutuk hodi fó liman ba malu hasoru dezafiu boot sira-ne'ebé mak mosu iha prosesu haburas ita-nia rain.

Ita tenke halo Timoroan sira sai unidu hale’u interese nasionál balun. Nasaun presiza opozisaun ida ne'ebé ativu, forte no kompetente, maibé sei iha dezafiu nasionál balun ne’ebé ezije opozisaun nia tulun no governu nia kapasidade atu rona no halo diálogu hodibele hetan susesu.

Nu’udar Prezidente Repúblika ha’u sei halo buat hotu-hotu tuir kompeténsia ne'ebé Konstituisaun fó mai ha’u, atu ajuda halibur hamutuk nasaun, promove sidadaun sira-nia partisipasaun iha dezenvolvimentu nasionál no serbisu hamutuk ho órgaun soberania sira seluk hodi fasilita definisaun no implementasaun ba polítikas dezenvolvimentu nasionál, iha nivel hotu-hotu.

Durante tinan dahuluk hosi ha’u-nia mandatu ne'e, ha’u nunka haluha kompromisu sira-ne'ebé ha’u halo ba povu bainhira ha’u eleitu.
Ha’u promete ba Ita-Boot sira katak ha’u-nia prioridade sira ba ha’u-nia mandatu iha tinan hirak oinmai sei nafatin, la muda.

Imi bele konta nafatin ho ha’u atu sai hanesan Prezidente Hotu-Hotu nian no ba Timoroan Sira Hotu, no mós fatór ida ne'ebé kaer metin unidade, diálogu no inkluzaun sosiedade nian. Hamutuk ita sei alkansa lailais liu metas dezenvolvimentu país nian no sei hadi’ak moris-di’ak ba Timoroan hotu-hotu.

Obrigadu barak ba Ita-Boot sira-nia atensaun!

Viva Povu Maubere!
Glória ba Povu!
Glória ba Repúblika Demokrátika Timor-Leste, ne'ebé serbí sidadaun sira!
Hamutuk ita sei manán.

Presidência da República Democrática de Timor-Leste
https://www.facebook.com/permalink.php?story_fbid=437072653411013&id=289592191492394

sábado, 12 de maio de 2018

Povo Nia Lian - Maromak Nia Lian

Foto contropiano.org
Dungannon 11-05-18: Ema hotu la hein katak Eleisaun Parlamentar Antecipadas atu mosu iha 2018. Ita la hein katak Eleisaun Parlamentar Julho 2017 lori tan krize politika dala ida tan mai Timor Leste. Krize ne'e hatudu mo-mos katak, ita iha krize de LIDERANSA. Ita iha krize kona ba "marketing politic", ita mos la asertivu kona ba hili termu wainhira voto la determina se mak manan eleisaun: Inklusaun, Koligasaun ka Insidensia Parlamentar? Historia hanorin ona katak CNRT ukun tinan sanulu ho partidu barak la hetan krize tan ba uza termu: Koligasaun.

Iha eleisaun ida ne'e, Partidu Politiku/Koligasaun sira (PEP, PD, PR, PF, MSD, MDN, FDD) kumpre ona sira nia obrigasaun, lori programa politiku ba apresenta ba povo husi lidun ba lidun durante fulan ida nia laran. Balu halo komisio nebe halibur ema rihun, seluk halo dialogo no dor-to-dor campaign.

Ema barak bolu kampanha ne'e hanesan FESTA DEMOKRASIA, seluk bolu VIVENSIA DEMOKRATIKA, seluk tan uza biban ne'e atu halo VIOLENSIA FISIKA no VIOLENSIA VERBAL hasouru ema inosente sira (feto, mane, katuas, ferik no labarik) nebe expressa sira nia liberdade liu husi kor ruma. ida ne'e mak retratu foer, ita hasai husi kampanha eleitoral ida ne'e. 

Ohin, responsabilidade tomak entrega ba CNE/STAE, Polling Staff no Fiskais sira iha Timor Leste tomak no Diaspora atu hatudu ba mundu, liu husi observador internasional sira dala ida tan katak ita hamutuk bele organiza eleisaun ida livre, kredivel no transparente hanesan mos eleisaun rua iha tinan kotuk: Eleisaun Presidensial no Eleisaun Parlamentar 2017.  

Rona tiha partidu sira durante fulan ida, Timor Oan ida-idak sei hakat ba fatin votasaun iha 12 de Maio 2018 atu koalia liu husi votasaun, hili tuir ida-idak nia konsiensia Partidu nebe mak merese liu Timor oan ida-idak nia votu? Lider ida nebe mak iha kbi'it naton atu bele garante PAZ, ESTABILIDADE, MUDANSA NO PROGRESSU? Lider nebe bele tane a'as lei inan, defende riku-soin, liu-liu, tane a'as Timor Oan ida-idak nia DIGNIDADE. 

Iha Norte Irlanda, Eleisaun Parlamentar Antesipadas (EPA) ida ne'e importante ba Timor Oan sira nebe hela no servisu iha ne'e atu exerse sira nia direitu nudar cidadaun, nudar Timor Oan ba dala uluk. Eleisaun ida ne'e mos laos deit fanu Timor Oan sira atu preokupa ho Estabilidade Politika rai laran ka afirma-an iha kor partidaria ruma, maibe halo sira hanoin hikas fali fatin nebe sira moris ba; halo sira hanoin fali uma lisan, uma knua, uma lulik, hatais tais, Tetum, historia, ai-han no riku-soin tomak nebe sura la hotu... 

Timor Oan nain 1287 mak sei vita iha cidade Dungannon. Tuir lei eleitoral, fatin votasaun la autoriza seguransa partidaria...ema nebe laos membro ka funsionario CNE/STAE sei hamri'ik do'ok metru 100 ida husi centru votasaun...lia sakat ruma nebe CNE/STAE labele resolve ho lia fuan, sei entrega autoridade PSNI nebe disponivel ona atu hare  seguransa molok, durante  no depois  kontajen de votos. Polling Staff no Fiskais sira preparadu ona hodi ajuda eleitor sira ba tesi-lia ba ita nia futuro liu husi votasaun.  

Mai ita hotu hakilar ho aten barani ba politiku sira katak respeita resultadu Eleisaun Parlamentar Antesipadas ida ne'e basa: POVO NIA LIAN - MAROMAK NIA LIAN.     

Media AMP NI
https://ampnirlanda.blogspot.co.uk/

segunda-feira, 7 de maio de 2018

Partidu Politiku Sira Para Ona Insultu, Povu Labele Monu ba Propaganda Divizionizmu

Resistência Nasional dos Estudantes de Timor-Leste 
RENETIL

Komunikadu Imprensa

Partidu Politiku Sira Para Ona Insultu, Povu Labele Monu ba Propaganda Divizionizmu

RENETIL refere ba surat neébe nia hasai iha loron 5 fulan Abril tinan 2018 ba Partidu Politiku sira, no konferensia imprensa neéba halo iha loron 6 fulan Abril 2018 kona-ba kampanha Partidu Politiku sira nian ba Eleisaun Antesipada 2018. Iha surat neéba, Renetil bolu atensaun ba hahalok no liafuan balun neébe lideres no apoiante Partidu Politiku sira nian hasai iha prosesu kampanha nian, neébe bele hamosu halo fraku koezaun social no iha potensia atu halo mosu konflitu iha sosiedade Timor-Leste nia laran.

RENETIL lamenta katak to’o ohin loron, loron 3 tan molok eleisaun, modu kampanha ida hanesan neé sei kontinua nafatin, no intensive liu tan. RENETIL mos observa katak iha esforsu hosi Partidu Politiku balun atu interfere iha votante sira nia liberdade atu vota.

RENETIL rekunhese katak Partidu Politiku sira iha dezejo boot atu garante katak entusiasmu no partisipasaun hosi populasaun atu partisipa iha komisiu politiku sira durante proses kampanhe neé tradus ba votus iha eleisaun iha loron 12 Maiu. Maibe RENETIL presiza fo hanoin ba partisipantes hotu iha Eleisaun Antesipada kona-ba pontu sira tuir mai:

1. Katak sufrajiu universal no liberdade atu vota neé direitu ida neébe konsagra iha Konstituisaun, ba povu atu bele exerse nia poder politiku. Presaun ba populasaun atu vota ba Partidu Politiku sira neé hanesan violasaun flagrante ba Artigu 7. (1) hosi Konstituisaun.

2. Artigo 233º hosi Kodigu Penal proibi propaganda eleitoral neébe ilegal. Partidu Politiku sira nia propaganda eleitoral hotu deit iha kampanya eleitoral, no iha loron votasaun votante sira sei ba vota tuir ida-idak nia konsiensia. Presaun ba votante sira atu vota ba partidu ruma iha loron eleisaun neébe konstitui krime eleitoral;

3. Artigo 240º hosi Kodigu Penal mos proibi ema atu fo sai ka hatete sai ema seluk nia votu, no considera hahalok ida neé nudar krimi ida; RENETIL enkoraja Partidu Politiku sira atu konkista povu nia votu liu husi programa politiku neébe konvense povu, no laos liu husi dalan koersivu ka presaun. Koersaun no presaun ba povu atu hetan nia votu neé praktika colonial, no iha Timor-Leste independente neé la iha ona fatin ba pratika sira ne’e.

Atu garante katak Eleisaun Antesipada 2018 neé bele la’o ho dame no hetan rezultadu ida ne’ebe justu no kredivel, RENETIL:

1. Partidu Politiku sira, atu:
  1. Para ho insultu hasoru lideres ka apoiante hosi partidu seluk;
  2. Para uza linguajem ne’ebe bele hamosu konflitu iha sosiedade nia leet;
  3. Lalika tau presaun ba populasaun atu vota ba partidu politiku ida ne’e ka ida ne’eba.
2. Ba populasaun tomak, atu:
  1. La monu ba propaganda politika neébe hafahe povu, no kontinua haburas no hametin harmonia iha ida-idak nia komunidade;
  2. Ba fo sira nia votu iha loron votasaun tuir ida-idak nia konsiensia, no la hakruk ba presaun hosi ema ka grupu ruma, hanesan iha Konsulta Popular 1999. Direitu atu vota ho livre neé hanesan parte neébe labele haketak (integrante) hodi liberdade neébe povu manán liu hodi luta naruk ida.
3. Ba PNTL, atu kontinua sira nia servisu hodi proteje povu hosi presaun no aktu korsivu sira iha, no aktua hasoru aktu sira neé tuir lei, hodi garante katak povu bele fo sira nia votu ho livre no tuir ida-idak nia konsiensia.

4. Ba membro RENETIL sira ne’ebe lekar iha Partidu Politiku oi-oin, atu buka hapara no koriji hahalok iha ida-idak nia Partidu laran, ne’ebe la tuir espiritu Libertasaun do povo.

Viva Timor-Leste!
Viva Democracia!
Viva RENETIL!
A Luta Continua!

Dili, 7 Maiu 2018

Francisco JMF. Belo Lires
1º Vice Secretario Genera

sábado, 5 de maio de 2018

Hanoin kiik balun husi autor iha ambitu selebrasaun loron Eleisaun Antesipada 12 Maiu 2018

Hanoin kiik balun husi autor iha ambitu selebrasaun loron Eleisaun Antesipada 12 Maiu 2018

Hakerek husi. Carinton Salazar G Freitas

Loos Ita Bele

Carinton Salazar G Freitas
Kritikas no opiniaun bele hato’o ba 
Carinton15@gmail.com
+67077903355
Ema seluk iha liur ne’ebá dalaruma husu konaba ejistensia demokrasia iha Timor-Leste ne’e oinsa loos maibe hakarak realsa de’it katak, la kleur tan ita hotu sei sai sasin ba festa demokrasia ida ne’ebé primeira ves akontese iha rai doben ida ne’e. Ejerse ita nia direitu ba daruak iha Eleisaun Antesipada ne’ebé sei bolu kolaborasaun tomak husi entidades no partes hotu-hotu nia responsabilidade atu ba vota tuir konsiensia direta no sekretu no espera katak ho ejerse ita nia direitu ne’e bele solusiona buat ruma ba rai avo lafaek nian.

Istoria hatudu katak maske ita mai husi diferentes origen, sukus, reliziaun no kor maibe ita hamutuk konsege transforma Timor-Timur sai Timor-Leste ida ne’ebé hamrik iha mundu rai klaran hanesan nasaun ida ne’ebé independente, livre no demokratiku. Ema barak laran moras no inveisa ho ita nia susesu hodi hakleuk ita nia istoria, hakleuk ita nia konstituisaun, hakleuk ita nia hanoin hakarak hateten ba Inan, Aman, Maun, Alin, Feton, no hotu-hotu katak dezafiu ida ka rua de’it sei la konsege estraga ita nia maturidade no mentalidade ida ne’ebé que forte tebes antes akontese eleisaun antesipada ida ne’e.

Mai ita hotu hateten lae ba diskriminasaun, lae ba hahalok immoral sira, lae ba liafuan aat no insultas sira, hamutuk ita tane ita nia nasaun hanesan nasaun ne’ebé forte iha sudeste asiatiku no hakbiit liutan demokratiku hanesan uma mahon, matak malirin ba ita hotu.

Ita nia lideransa sira servisu makas tebes antes ne’e komesa husi hahu, hatutan no too hakotu no nudar povu ita tomak konsege reklama ita nia vitoria liu husi eleisaun referendum 1999, ikus mai rejultadu hatudu katak ita mos sai nasaun ne’ebé firme tamba sira, no ita hotu nia partisipasaun ne’ebé boot tebes iha prosesu tomak hahu husi konstrusaun funu too konstrusaun estadu.

Ohin loron ita bele toba iha dalan ninin wainhira la’o dalan sinte kolen no dukur, ita bele la’o kalan husi Suai ba Lospalos sinte kolen bele toba iha same iha ailaran wainhira hakarak la tauk ba buat ida, la tauk ba ameasas no intimidasaun sira. Tamba ita hetan ona direitu ida ne’e.

Vitoria lolos no boot mak vitoria ne’ebé ita sinte, la’os la’os vitoria boot ne’ebé ita simu. Maske nune’e ita simu ona vitoria maibe ita seidauk sinte vitoria ne’e rasik hakbesik aan ba sentru votasaun sira hodi hato’o hikas ita nia liman rohan balun, ita nia partisipasaun balun, maske tenki hein kleur oras ida, oras rua ka oras tolu hatudu netik ita nia espiritu sabedoria, espiritu nasionalismu no dedikasaun ba ita nia rain lulik ida ne’e.

Loos Ita Bele

Haksumik husi krizes oin-oin no hatudu ba mundu tomak katak ita bele, ita hatudu ona maske ho forsa ne’ebé bele sukat maibe ita halo ona buat barak ba ita nia rain doben ida ne’e.

Ita hotu hasan hikas sentidu nasionalismu no patriotismu iha ita nia kabas ba dala ida tan, maske la hakerek istoria maibe realidade agora tenki hakerek hikas iha jornada eleisaun ne’ebé akontose iha tinan rua tuir malu 2017 ho 2018.

Forsa nafatin inan, aman, maun alin sira iha kualker fileira demokrasia.

Kbiit foun sei mosu, mentalidade foun sei mosu, wainhira ita hotu hamutuk atu muda mundu ne’e no liu-liu muda timor-leste sai hanesan ijemplu maturidade politiku ba nasaun postu komflitu sira, no liu-liu ba nasaun foun sira ne’ebé foin koko atu hari sira nia aliserse. Presija hakas aan atu fo hanoin nafatin ba ita nia avo, ita nia tiun/tian, ita nia maun/mana sira atu bele fo hikas naroman foun mai ita liu husi hahalok moris ne’ebé diak, ambiente ne’ebé saudavel, ambiente ne’ebé nakonu ho damen, ambiente ne’ebé ema tomak preukupa ho ninia aan no ba nia nasaun liu husi dalan ne’ebé adekuadu no demokratiku no forte.

Hare ba realidade ne’ebé akontese iha ita nia rain bele nota katak sei iha buat barak ne’ebé sei falta, buat barak ne’ebé presija hadia, buat barak presija hadiak liutan no hanesan Timoroan ita sei la husik ita nia rain kontinua ho situasaun ida ne’e, ita nia dezinvolvimentu presija abansa, ita nia eskola sira presija iha akreditasaun ne’ebé diak, ita nia emar sira presija iha kondisaun saude ne’ebé adekuadu, ita nia inan feto sira liu-liu ba kazada sira presija iha kbiit naton maske sira la’os xefe ba familia ida, maibe sira mos bele hetan rendimentu hodi apoiu hikas sira nia familia kiik sai hanesan familia ne’ebé forte tebes. Vitoria de’it sei labele halo buat ida se ita labele sinte saida mak iha vitoria ne’e nia laran.

Mai ita hamutuk hakbiit fali ita nia sentidu nasionalismu, ita nia sentidu patriotismu servisu makas liutan hahu husi ita nia aan rasik hodi bali ita nia maluk sira ne’ebé kbiit laek, hodi bali ita nia maluk sira ne’ebé iha partidu sira seluk, hodi bali inan feto sira ne’ebé hakilar maske lian la rona, hodi bali maluk kbiit laek sira ne’ebé halerik hela iha dolok ninin, dolok kuak, mota kuak no foho leten ne’ebá, hateten ba sira imi nia partisipasaun, imi nia esforsu no ita hotu nian mak ohin loron ita nia nasaun sai boot no forte iha mundu rai klaran.

Mai ita hamutuk kontra esplorasaun sira, hamutuk ita kontra esplorasaun husi moras ba ema, hamutuk ita kontra esplorasaun husi ema ba ema, hamutuk ita kontra esplorasaun husi riku ba kiak, hamutuk ita kontra esplorasaun husi ema matenek ba ema beik sira, liu husi dalan ne’ebé demokratiku. Hakbesik aan ba sentru votasaun sira hodi hamutuk ita sai sasin ba festa demokrasia no hatudu sinal la iha ema ida hela iha kotuk.

Ita nia istoria ida de’it hahu husi Don Boaventura to’o 1975 mai too iha 1999, hakerek nanis ona ita nia aman, ita nia inan, maun sira konsege halo buat lubuk ba rai ida ne’e konsege transforma rai ida ne’e ba moris mesak, moris livre no independente iha mundu rai klaran.

Eleisaun Antesipada besik ona loke fuan ho laran, loke matan ho neon katak ita mak hakerek ita nia istoria rasik, ita mak dirige rasik ita nia dalan hanesan sarani katolika, eleisaun ida ne’e atrabesa kedas ho fulan rosariu Nain Feto Maria Auxiliadora nian, nune’e husu boot nain feto kontinua tulun ita, hadok ita husi sala no hakuak ita hotu iha dalan ne’ebé trankilu no damen.

Fulan ida ne’e mos sai hikas momentu ida ne’ebé hafanu hikas ita nia aan, tempu ita nian atu hakbiit nafatin demokrasia no hanesan maklokek ba jornada VIII Governu ne’ebé forte no valente. Ema barak bele hateke ita ho matan sorin, ema barak bele koalia aat ita, ema barak bele la gosta ita demokrasia nia lalaok mak nune’e ona. Ita hein mehi ne’ebé ita hakarak liu husi ejerse ita nia diretu iha sentru votasaun sira.

Obrigadu wain

Autor hakerek la reprejenta partidu politiku ka isntituisaun ne’ebé servisu ba maibe hanesan expresaun simples nudar sidadaun bain-bain iha rai ida ne’e.

Kritikas no opiniaun bele hato’o ba 
Carinton15@gmail.com
+67077903355