PADRE JOSÉ CARLOS SIMPLÍCIO – Misionáriu hosi Açores iha Timor-Leste

Neneik Uma-Kreda iha Timor-Leste lakon nia misionáriu sira ne’ebé serbsiu iha tempu malae mutin portugés ukun Timor.

Amo Bispo Carlos Filipe Ximenes Belo

Ita nia rai, iha de’it amo lulik raai na’in hahú 1936, ho padre Jorge de Barros Duarte (inan ema Same), no padre Martinho da Costa Lopes (laleia) no padre Jacob Ximenes (Laleia), iha tinan 1947. Ikus mai, amo lulik timor oan r malu ordena tui-tuir hahú tinan 1963. Misionáriu uluk ema malae mutin hosi Portugal, Açores, no ema indianu hosi Goa.

Padre José Carlos Simplício nia moris iha Ilha/pulau, naran Pico, iha loron 4 fulan agostu 1937. Sei moris karik, loron haat fulan agostu mai ne’e, sei halo tinan 80. Nia to’o iha Timor Portugés iha tinan 1965. Serbisu iha Lecidere, hanesan Sekretáriu amo Bispo Dom Jaime Garcia Goulart nian. Iha loron 18 fulan janeiru tinan 1966, Dioseze Dili, halo tinan 25. Iha tinan ne’ebá amo Bispo hafoun revista SEARA, ne’eb hahú publika iha 1949. Fou-foun sai hanesan revista, no fulan dia, sai dala ida; ikus mai, fulan rua ka fulan tolu sai dala ida.Iha tina 1964 no 1965, la publika.

Iha tinan 1966, SEARA nafilak ba jornal semanal. Direktór mak Padre António Jacinto de Campos; xefi redasaun mak Padre José Carlos Simplício. Iha tinan loron 1 fulan fevereiro tinan 1967, nia sai Direktur, hodi ka’er jornal to’o 1968. 

De facto, iha tempu ne’ebá SEARA tatoli ba sarani timor oan buat foun  barak: lia foun (notisia) kona ba Concilio Vaticano II; lia menon kona ba Liturgia; notisia hosi Igreja iha Portugal no Europa ka mundo rai-klaran. Nune’e mos fo sai buat ne’ebé mosu iha parokia sira iha Timor Loro Sa’e.

Tan ba jornal publika artigo balu ne’ebé halo  kritika kona ba situasaun iha  Timor, Pide, ka “serviços secretos” malae mutin haruka taka tiha SEARA iha tinan 1973.

Bainhira Padre José Carlos nia sei iha Díli nia mak hanorin “disciplina  Religião Moral “iha Liceu Dili. Nia antigos alunos barak; ida mak Dr. José Ramos-Horta.

Padre José Carlos Simplício 

Padre José Carlos sai hosi Timor,  ba serbiu iha California (USA) hodi tau matan ba ema Emigrante. Ikus mai nia fila ba Açores hodi hala’o nia knar iha ne’ebá hanesan amo lulik no eskritór. Nia simu atan ha’u dala tolu iha nia uma. Nia konta buat barak kona ba Dom Jaime no buat seluk tan kona ba rai misaun iha Timor Loro Sa’e. 

Nia mak tau matan ba amo Bispo Dom Jaime Garcia Goulart, bainhira Bispo moras no iis kotu iha ospital iha Ponta Delgada (São Miguel-Açores). 

Ita timor oan sei agradese ba Nai Maromak tanba missionariu hosi Açores ba serbisu iha ita nia rai. Amo  Bispo ne’ebe hosi Açores no tau matan ba Timor hamutuk na’in haat; amo lulik hamutuk na’in 15; irmaun hamutuk na’in rua. 

Sira loke Seminario Menor de Nossa Senhora de Fátima; loke Colégio Ossu; tau matan ba Colégio Soibada no Colégio Maliana. Sira tulun timor oan barak sai matenek, no balu sai lider partido nian, no ikus mai, líder Nasuan Timor Lopro Sa’e nian. 

Nái Maromak simu amo lulik José Carlos Simplício nia klamar iha Lalehan.

Porto, 7 de juñu 2017

Amo Bispo Carlos Filipe Ximenes Belo