LUÍS DE CAMÕES – 10 DE JUNHO iha Timor

LUÍS DE CAMÕES – 10 DE JUNHO iha Timor

Iha loron 10 fulan juñu Portugal halo festa ba nia herói boot poeta Luís de Camões. Loron ne’e bolu mos “Dia de Portuga” no “Dia das Comunidades”.

Amo Ximenes Belo

Iha tempu Portugal sei ukun Timor, iha Dili, iha lisan halo festa mos. Ema hosi Concelho (Município) sira tun hotu ba Praça (Dili) atu partisipa iha festa ne’ebá. Bainhira loron boot ne’e to’o ona, dadersan iha “Palácio do Governo” nia oin, iha “Praça Dom Henrique”, hala’o serimónia dada bandeira Portugal nian. Serimónia ne’e hahú tuku sia (9), ho prezensa autoridades sira nian: Governador , Comandante Militar, Meretíssimo Juiz Tribunal, Delegado do Procurador da Repúblca, Bispo da Diocese de Dili, Cônsul da Australia, China (Formosa), Indonesia no França, no funsionariu sira, tropas hosi Taibessi, polísia, alunos no meninas hosi eskola iha Dili laran no Liceu. Ami, alunos hosi Seminário Dare no Colegio São Francisco Xavier, mos tun hotu ba Dili hodi tuir festa ne’e.

Serimónia dada bandeira remata tiha, iha tuku 10.00, hotu hotu ba Igreja Motael atu assiste “Benção do Santíssimo Te Deum de acção de graças”.Iha serimónia seminaristas hosi Dare mak hananu.

Loraik, iha fatin, oras ne’e temi “Campo da Democracia”, (uluk Kampung Pramuka), hala’o “corrida de cavalos”, kuda sira halai taru. Kuda ne’ebé manan beibeik mak kuda hosi Suai. Iha kalan, iha Palácio do Governo nia kotuk (agora fatin uma fukun Parlamento nian) iha barracas barak neb’e halo jogos oin oin.

Iha tempu ne’e “Governo da Província” kostuma fó kondekorasaun. Iha tinan 1966, Govenru fó konderkorasaun (Medalha da Instrução Pública) ba Professores-Catequistas ne’ebé serbisu iha Escola Dioseze Dili nian. Mestre n’ebé simu ba dala uluk mak Mestre Egídio Meles Dias Ximenes (hosi Soibada). Iha tinan sira tuir mai, Mestre sira ne’ebe simu kondekorasaun mak Mestre António Atanásio da Costa Soares (hosi Baucau), Mestre José Araújo (hosi Suai) no Professora Dona Maria da Glória Veríssimo Soares (Mestre Atanásio nia kaben). Oras ne’ee, iha Timor-Leste, Governu ho Povu halo festa nasional seluk, hodi fó omenajen ba ema asuwa’in ne’ebé funu no ba loron independensia nian. 

Ita hein, ita nia governu mantein nafatin relasaun diak ho Portugal no nasaun hotu hotu. No bele karik, fó mos kondekorasaun ba Professor/Mestre/ guru sira, no enfermeiro no enfermeira sira. 

Porto, 9 de junho de 2017.
Amo Bispo Carlos Filipe Ximenes Belo