VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20160223

Vicente Guterres, Sees husi Justiça


Vicente Guterres Sees husi Justiça

Hosi: Luís de Jesus Pires

Iha V Governo Constitucional, PM Xanana Gusmão haruka surat ida ba Parlamento Nacional (PN) atu labele levanta imunidade ba membru Governo sira iha caso ho justiça. Razão nebe Xanana evoca mak processo julgamento sei perturba concentração membro Governo sira hodi halo la’o sira nia função ho diak. Nune’e, Xanana husu, atu processa membro Governo sira iha caso, bainhira sira nia mandato hotu ona. Mas ida ne’e la resolve problema ida, porque, bainhira ema ida iha caso ida ho justiça, durante caso ne’e seidauk resolvido, kalan loron halo nia preocupado, e toba ladukur. Caso ho justiça, atu sala ou loos, bainhira seidauk resolvido, hanesan fatuk oan ida iha sapato laran. Atu bele hakmatek, tem que hasai fatuk oan ne’e husi sapato laran, ou buka acelera resolve caso nebe iha, hodi hetan solução ida final, e definitivo. Problema seluk tan ba justiça, se hein mandato hotu mak processa, alegado ou arguido sira sei usa meios oioin hodi halo lakon hotu evidência sira.

Presidente da República, Taur Matan Ruak, koko contribui ba Governo ida moos. Ho nune’e nia decide la fo posse ba candidato ba membro VI Governo Constutucional balun, hanesan caso Secretário de Estado Fortalecimento Institucional, Francisco Soares Borolaco nian, hodi hein processo julgamento.

Medidas nebe Presidente República Taur Matan Ruak hola loos ona, merece ema hotu nian apreciação, e apoio. Infelizmente, Presidente República halo tratamento mak la hanesan. Por exemplo nia la fo posse ba Sr. Borolaco, mas nia fo posse ba membro Governo seluk, nebe mos iha caso ho justiça hotu. Bele temi ida, hanesan caso Secretária Estado da Cultura, Isabel Ximenes, nebe iha caso ho justisa hotu, mas simu posse nafatin. Tratamento ida discriminado e injusto.

Mas iha fonte balun, hateten, Sr. Borolaco mak husu rasik atu labele fo posse ba nia, tanba nia iha caso ho justiça. Se iniciativa ne’e mai husi Sr. Borolaco duni, ida ne’e merece ita hotu nian apreciação, tanba só ema sira nebe maduro, e iha sentido de estado mak bele halo ida ne’e. Tuir lolos, membro Governo sira nebe iha caso, tenke banati tuir ida ne’e. Ida ne’e bele sai referência ida hodi ema hotu bele banati tuir hodi contribui ba processo harii estado nebe loos ho diak.

Ho surat PM Xanana Gusmão nian nebe husu ba PN atu labele levanta imunidade ba membro Governo sira, membro Parlamento Nacional balun hanoin, Xanana nia pedido ne’e atu cobre hotu sira. Sira haluha tiha Governo orgão ida, e Parlamento orgão seluk. Xanana só husu labele levanta imunidade ba membro Governo sira, la’os husu ba membro Parlamento. Xanana ninia pedido ne’e,  agora la vigora ona. PM foun, Rui Maria de Araújo, nebe lidera VI Governo Constitucional, anula ona pedido eis Primeiro Ministro Xanana nian. Rui Maria de Araújo autoriza ona atu PN bele levanta imunidade ba membro Governo sira nebe iha caso, hodi sira ba hatan iha Tribunal. Decisão PM Rui Maria de Araújo nian ne’e merece ita hotu nian apreciação, e apoio, tanba ida ne’e hanesan parte ida hodi kombate corrupção nebe halo kiak ita nia estado, nação no povo.

Presidente PN, Vicente Guterres, mak sei hili bidu hela iha tahu laran, buka razão oioin atu lakohi ba hatan iha Tribunal. Tribunal husu dala barak ona ba PN, atu levanta Vicente Guterres ninia imunidade, hodi nia ba hatan iha tribunal. Mas Presidente PN ne'e, nebe mos hanesan lider CNRT nian ida, tau condição oioin hodi lakohi coopera ho justiça ou labele ba hatan iha tribunal. Condição sira ne’e mak: 1). Husu transmissão directa ba ninia julgamento iha tribunal; 2). Tem que iha lei especial ba julgamento Presidente RDTL, Presidente Parlamento Nacional, Primeiro-Ministro e Presidente do Tribunal de Recursos; 3). Tem que hadia codigo processo penal Timor-Leste nian; 4). Tem que halo reforma iha Ministerio Público ho Tribunal.

La normal, alegado ou arguido ida buka tau fali condição ba tribunal hodi halo julgamento ba nia. Atu halo transmissão directa ou lae, ne’e depende ba juíz sira, la’os depende fali ba alegado ou arguido ida. Lei ba sidadão hotu-hotu hanesan, laiha lei ba boot sira ketak, e ba ema ki’ik sira ketak. Iha lei nia oin ema hotu hetan tratamento hanesan, laiha lei especial ba ema ruma. Tratamento especial ba ema ruma sei hamosu deit descriminação ho injustiça, nebe sei bele cria instabilidade, tanba discrimina sidadão sira ba primeira ho segunda classe. Bainhira ema barak senti descriminado, e injustiçado, mak sira sei hamrik halo problemas nebe bele hamosu instabilidade nacional. Hadia codigo processo penal ou halo reforma iha ministerio público, tenke bazeia iha estudos ruma, la’os atu hadia ka halo reforma ho objetivo atu protege na’i ulun criminosos ou corruptores sira.

Tuir Vicente Guterres, se la satifaz condição 4 temin iha leten, nia sei lakohi ba hatan iha tribunal. Vicente Guterres la’os koko liu husi dalan ida de’it, mas liu mos dalan seluk hodi evita ba hatan iha Tribunal, por exemplo, to’o agora, Vicente Guterres, la hatun despacho sobre nia caso ba Comissão de Etíca do Parlamento Nacional hodi halo analize, tetu, e hola decisão atu husik nia ba hatan ou lae. Nia mos lakohi halo ajendamento iha encontro lider Bancada sira nian, e lakohi lori nia caso ba plenaria hodi submete ba debate hodi levanta ka labele levanta ninia imunidade.

Iha caso Presidente PN, Vicente Guterres nian, nia la’os halimar mesak, mas nia halimar hamutuk ho lider CNRT sira seluk. Vice Presidente PN, Aderito Hugo da Costa, nebe mos hanesan lider CNRT nian ida, fo impressão, hanesan sira rua Vicente Guterres halimar hamutuk ou halo konkalikong, atu labele dudu processo Vicente Guterres nian ba oin. Aderito Hugo da Costa ho nonok-nonok, husi kotuk, haruka surat ba tribunal hodi hateten katak, PN la autoriza Vicente atu ba hatan iha tribunal. Mas iha realidade, tuir deputados balun, to’o presente data, la iha encontro ruma, nem iha discussão ruma, atu entre lider Bancada sira ou debate ruma iha plenaria, nebe membro Parlamento sira manifesta ou decide lori PN nian naran hodi  la aseita julgamento ba caso Vicente Guterres nian. Aderito Hugo da Costa koko manipula, e usa PN hodi protege Vicente Guterres, tanba sira partido hanesan ou partido ida de’it.

Razão seluk tan nebe Vicente Guterres usa hodi sees husi justiça mak nia buka subar iha instituição Parlamento nia okos, hodi evoca katak, nia nudar Presidente Parlamento Nacional, neduni labele julga nia. Vicente koalia ba jornal Timor Post, edição 16/02/2016, katak: “Matebian sira la permite ita atu halo foer rai ida ne’e nia naran porque halo foer Prezidente Parlamentu nia naran ou orgaun soberanu seluk nia naran povu tomak nia naran foer, la’os Vicente Guterres ou ita nia Prezidente Taur Matan Ruak ou nia Primeiru Ministru Rui Maria de Araujo lae.” Vicente Guterres continua defende an hodi dehan: “Ita nu’udar estado, nu’udar povu ita nia naran mak foer i ne’e orgaun soberania Parlamentu Nasional I ha’u nudar Prezidente Parlamentu ha’u sei la permite ida ne’e to’o iha altu.”

Vicente Guterres la’os naran seluk husi Parlamento Nacional nian, tan ne’e, se Vicente Guterres, “karik halo participação económica”, tribunal sei condena mak Vicente, la’os Parlamento Nacional. Parlamento Nacional labele responsabiliza ba crime ida nebe membro Parlamento ida halo, hanesan mos Governo labele responsabiliza ba crime ida nebe membro Governo ida halo. Exemplo diak mak Ministério de Justiça labele responsabiliza ba crime nebe Sra. Lucia Lobato halo. Sra. Lucia Lobato mak condenada, e ba cumpre ona ninia pena iha Gleno, la’os Ministério de Justiça. Se Presidente PN, Vicente Guterres, hakarak defende duni naran diak Parlamento Nacional, unica dalan nebe iha mak, nia tem que coopera ho justiça, la’os sees husi justiza, ou dada problema sai naruk. Arrastamento ba problema Vicente Guterres nian mak sei prejudica imagem Parlamento Nacional nian, porque público mos haree, Parlamento Nacional mak halo, e aprova lei sira, nunee mos sira mak fiscaliza, halo oinsa sira mak lakohi halo tuir fali lei, e pior liu tan, hakarak halo lei ida tan atu halo tratamento especial ba sira? Buat ruma funciona ladun diak ona iha rai ida ne’e, tanba ne’e, na’in ulun sira nia hanoin, haree hanesan la’o ladun loos, e buka kahur sasan arbiro. Timor-Leste sai tiha país arbirozar ida.

Atu conclui, e sai hanesan recomendação hotu, Sua Excelência Presidente PN, diak liu fo exemplo diak ba cidadão Timor-Leste sira, coopeara ho justiça, lalika buka ziguezague ba mai. Diak liu cumpre lei hanesan qualquer cidadão Timor ida nebe cumpre lei sira vigora iha Timor-Leste.   

* Artigo ida ne'e la representa instituição ou organização nebe autor hala'o nia knaar ba.

Sem comentários:

Enviar um comentário

Nota: só um membro deste blogue pode publicar um comentário.