VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20160129

500 ANOS – TINAN ATUS LIMA: Kapítulu 46 – Dom José da Costa Nunes, Bispo de Macau e Timor (1920-1940) - Parte datoluk

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

Kapítulu 46Dom José da Costa Nunes, Bispo de Macau e Timor (1920-1940)

Parte datoluk: Amo Bispo nia knaar iha Timor

Dom José da Costa Nunes sai bispo de Macau ho Timor iha tinan 1920. Iha tinan 1924, nia ba vizita kolonia Timor atu haree situasaun  iha rai laran. Bainhira nia to’o iha ne’ebá, Misaun fahe ba Vicariato geral rua: Do Norte (Lahane) e do Sul ou Contra-Costa (Soibada); amo lulik sira oitoan deit, no balu hanesan professor/guru; timor oan ne’ebé  converte ka hakarak sai sarani oitoan mos; konfesa desobriga la dun barak; ema né’ebé komunga la iha, konfesa mak barak fali; la iha regulamentu ida atu fo orientasaun ba amo lulik sira; no amo lulik balu moris mesa-mesak no dook hosi maluk seluk.

Bispo to’o Lahane, hahú uluk ho retiru ida ba padre sira. Ba objektivu  nia konvida nanis amo lulik jesuíta ida atu dirije retiru iha Lahane. Hafoim Bispo José da Costa Nunes sa’e karreta, dala ruma sa’e kuda ba vizita misaun sira iha “interior”.

Molok atu fila hikas ba Macau, Bispo hola desizaun importante balu: nia fo sai dekretu ida atu unifika Vicariatos geral rua ba ida deit: Vicariato ho sentru iha Lahane (Dili); nia loke Eskola ba Professores-Catequistas; nia loke Colégio de Santo António iha Dili, no ikus mai sei muda ba Dare; nia loke mos Escola de Artes e Oficios (sapataria, carpintaria, serarlharia); no mos loke banda de música iha Lahane.

Além de ida ne’e nia mos hakerek Relatório ba Governo (Lisboa) no ba Governo provincial (Timor), hodi defende ema timor oan: husu atu tulun iha edukasau; fasilita ensino agrícola; husu autoridades sira atu labele hanehan povu timor ho impostos. Nia mos husu ba amo lulik sira atu halo retiro tinan tinan, haruka relatório ba Macau kona sira nia atividades.

Dom José da Costa Nunes hili padres “asuwain” nain rua ne’ebe sei tulun amo Bispo ukun didiak rai misaun iha Timor: Padre Manuel Mendes Patricio no Padre Abilio José Fernanades.

Iha tinan 1937, Dom José da costa Nunes inaugura Igreja Matriz iha Dili no igreja de Nossa senhora de Fátima iha Ainaro.

Nia mak dudu atu Misaun iha Timor sai Dioseze ida. Ida ne’e mosu iha 4 de Setembro de 1940. Ikus mai, Dom Jose da Costa Nunes husik Macau, ba ukun Diocese Goa, Damão e Diu hanesan Patriarca. Iha tinan 1962, amo Papa João XXIII foti nia ba Cardeal. Nia mate iha Roma iha tinan 1976.

Bispo Dom José da Costa Nunes merese atu povu no sarani timor presta homenagem ida ba nia, hodi harii estátua ida ka tau nia naran ba liuron (rua, avenida) iha Dili laran ka iha misaun ruma nia laran.

Mabié, ohin loron, ema la hatene istoria igreja nian. Hatene liu mak partidu nian no politikus sira nian… tanba ne’e mak ema balu  haruka hasai tiha Dom António Joaquim de Medeiros nia naran  iha “Avenida Bispo Medeiros”, no tau fali naran seluk.

Infelizmente… sayang sekali…” Politika mak domina, ideolojia mak domina… osan mak domina…

Ita barak, amo lulik ka líderes políticos, ita nia aman, inan ka abó sira ne’e bé uluk sai funsionariu, liurai ka professor, sira aprende iha eskola ne’ebé Misaun mak kaer ka harii…

Dom Carlos Filipe Ximenes Belo
Premiu Nobel Paz 1996

Sem comentários:

Enviar um comentário

Nota: só um membro deste blogue pode publicar um comentário.