VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20150818

Tinan Atus Lima: KAPITULU 13 - Governador António Coelho Guerreiro

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

KAPÍTULU 13.º - Governador António Coelho Guerreiro

Iha tinan 1701, vice-rei iha Goa, Dom Luís da Câmara Coutinho foti sekrtariu Estado da Índia, António Coelho Guerreiro Governador ba ilha Solor no Timor. Nia sai hosi Goa iha fulan maio 1701. To’o tiha Macau, António Guerreiro aluga ró-ahi rua Saun Pedro no Santu Antonio atu tula ema no sasan ba Timor. Iha loron 2 fulan janeiro 1702, nia to’o portu Larantuka. Iha ne’e ba nia hetan susar barak hosi liurai Domingos da Costa. Governador kontinua nia viajen ba Timor, no to’o LIfau iha loorn 14 fulan janeiru. Sorti boot, iha tempu ne’eba, padre frei Manuel de Santo António, hala’o hel serbiu iha reinu Lifau. Frei Manuel mak tulun governador tun hosi ró na tama knua Lifau. Iha loron 20 fulan fevereiro, António Coelho “toma posse” hanesan governador. Iha loron 21, hala’o missa ida iha igreja Amameco nian. Iha serimína ne’e,i sira lee Carta patente, ne’ebé vice-rei foti António Guerreiro hanesan governador no kapitaun-jeral. Iha loron ne’e mos, padre Manuel de Santo António mos reza missa ida iha Kapela de Santo António, iha Lifau, hanesan agradesimentu ba Na’in Maromak.

Buat diak ida ne’ebé Governador foun halo, mak buka atu sai belun diak ba Liurai sira iha Província dos Belos no Província de Servião. Nia mos husu Liurai Portugal, Dom Pedro II no vice-rei Goa, atu hametin defeza iha Prasa Lifau hodi haruka tan soldados no kilat. Nia estabelese administrasaun militar, sivil no judicial. Iha nia tempu, mak estrutura governu iha Timor laó tuir lolós Ukun ka governu rai ida nian.

Iha tinan 1703, reinu 23 iha Timor tuir Partido Real, ne’ebé fo apoio ba governu portugés; reinu balu mak tuir mai ne’e: Sarao, Matarrufa, Hume, Sama, Laga, Faturó, Fatu-Lete-Luli, Viqueque, Samoro, Claco, Manatuto, Luca, Boilo, Vemassin, Mauta, Tutuluru, Lacluta, Alas, Camenasa, Bibiluto, Matanião (matebian), Amanato, no Amarrace. Reinu ne’ebé la simu soberania portugés no kontra governu, mak tuir mai ne’e: Servião, Amabeno, Amanuban, Boro, Asaun, Mena , Maubara, Mutael no Likusae. Atu manan liurai timor sira nia fuan no laran, governador fahe patente militar ba sira: nia hasai diploma ida atu fó patente: Koronel, Tenente-koronel, major, kapitaun, tenente, alferes no sarjentu. Liurai boot sira hetan patente Koronel; liurai nia oan boot ka alin, ne’ebé sai rejente reinu nian, hetan patente Tenente-Koronel; Dato sira hetan patente Major; xefe suku sira hetan patente kapitaun; xefe povoasaun hetan patente sarjentu. Hafoin governador mos hakiak tropas “2.ª linha” ka milícias atu defende Prasa Lifau, tan ba iha tempu ne’eba, seidauk iha tropa “1.ª linha”,ou ezérsitu regular. Governador mos hahú hametin defeza iha foho no laletek Lifau. Nia haruka ema halo didin haleu knua Lufau: hada baki no didin ho ai-rin no akar-rin, no akadiru-rin. Iha klaran, ema harii governador nia uma, ne’ebé halo ho tali tahan; sira mos harii osptial kiid ida, no kapela Santu Antóniu nian. Atu hetan ai-han, governu husu ba liurai sira atu haruka ba Prasa Lifau, foz, batar no balada (manu, fahi no bibi). Maibé, reinu balu, liu liu Domingo da Costa, hakrak hadau ukun; ne’e duni sira tau serku ba Prasa. Dala barak, ema ne’ebé hela iha Prasa laran susar atu hetan ai-han, tanba labele halai natar no halo to’os no kintal. Iha tinan ida, Prasa Lifau kuran duni hahán. Governador hakrek katak iha tempu ne’ebá, ema iha Lifau han deit na’an asu, busa, ular, ai-ábut, animal nia ruin ne’e sira harahun hanesan batar-uut, karau kulit, sapatu no botas nia sola. Tempu mos la dun diak, rai manas no moras oin oin. Tanba ne’e, ema besik atus haat(400) mak mate.

Entretantu liurai nain sanulu resin tolu hakerek surat ba Liuari Portugal, Dom Pedro II atu husik Governador António Coelho Guerreiro konitinua iha Timor. Maibé, Iha tian 2005, governador hasoru problema barak. Tanba n’e, nia hakerek surat ida ba vice-rei atu tun hosi governu. Nia sa’e ró-ahi ba Batavia, hafoin liu ba Goa. Atu troka governador, sira hili hanesan governador interino Bispo frei Manuel de santo António, ne’ebé ukun Timor ilha loron sanulu resin lima nia laran. Tuir António Coelho Guerreiro, governador seluk ne’ebé ukun Timor no Solor: Bispo Dom frei Manuel de Santo António, governador interino; Lourenço Lopes, governador interino (1705-1706); Jácome de Morais Sarmento (1706-1710), Dom Manuel de Sotomaior (1710-1714, Manuel Ferreira de Almeida (1714-1715), liurai Domingos da Costa, governador interino (1715-1718) .

Iha kapítulu tuir mai, ita sei ko’alia kona ba Liurai Domingos da Costa Governador interino ba dala uluk.

Dom Carlos Filipe Ximenes Belo
Prémio Nobel da Paz 1996

Sem comentários:

Enviar um comentário

Nota: só um membro deste blogue pode publicar um comentário.