VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20150802

Tinan Atus Lima: KAPITULU 11 - Situasaun Uma Kreda Molok Sekulu XVII Remata

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

KAPÍTULU 11.º - Situasaun uma kreda molok sékulu XVII remata

Tuir hakerek-na’in anónimu nia surat ba autoridade iha Goa, moris sarani iha illa Solor (Flores) no Timor aat liu! De facto, iha tinan hirak ne’ebá iha duni amo lulik dominikanu ne’ebé hela iha reinu balu hanesan tuir mai ne’e: frei António da Madre de Deus, Vigário das Cristandades de Solor e Timor e Comissário de Santo Oficio, (reinu Noimuti); frei Bernardo Sarmento (reinu Luca), frei António da Encarnação (reinu Oe-cusse), frei João da Graça, vigário, (reinu Amameco), frei Domingos da Anunciação, vigário, (Lifau), frei Francisco de Nazaré, vigário (reinu Hera), frei Pedero d’Esperança (reinu Viqueque).

Bainhira ko’alia kona ba relijiaun katolika iha Timor no Flores, hakerek-na’in haktuir katak, banhira Liurai Portugal, Dom Manuel I (dahuluk) haruka navegadores sira atu descobre rai foun iha América, África no Ásia, nia la haruka ema atu buka deit riku-soin, maibé fo knaar ida ba sira atu habelar relijiuan katolika no hasoru ema islam sira. Tanba ne’e, nia mos fó lisensa ba relijiozu atu ba halo misionasaun iha rair hirak ne’ebá. Maibé to’o tiha rai misaun, amo lulik sira la moris tuir sira nia obrigasaun. Balu la reza ofisiu divinu, balu la konfesa, balu reza misa semana ida dala ida. Sira la harii eskola, la publika katesismu, la hanorin doutrina ba labarik sira, la akompaña mate isin ba hakoi. Bainhira to’o ona tempu atu haruka relatório ba sira nia superior iha Goa, amo lulik sira ba lalais hasoru liurai atu haruka nia emar ba uma kreda atu simu batizmu.

Liurai sira atu hatudu sira laran luak, haruka hosi knua ema na’in limanulu (50), ou atus ida (100), mane, feto, labarik mane , labarik feto, katuas no foin sa’e. Bainhira ema hirak ne’e to’o uma kreda, amo lulik fo kedas sakaramentu baptizmu sein hanorin uluk doutrina no halao preparasaun. Simu tiha sakramentu batizmu, ema hirak ne’ fila ba knua, la moris hanesan sarani, maibé, moris tuir lisan antigu nian.

Ema ruma husu karik sarani foun ne’e nia naran, “ó naran saída?” - nia sei hatan: “hau la hetene; amo lulik mak hatene!”

Iha Viqueque, liurai Mateus da Costa entrega povu hosi nia knua atu tuir doutrina; maibé, amo lulik la halo buat ida, la hanorin doutrina, la halo preparasaun atu simu sakramentu sira; nia sarani deit. Tuir liurai Mateus, sarani foun sira fila ba sira nia knua, sira kontinua moris hanesan bain-bain, halo estilu, moris tuir lisan jentiu; ne’e duni, bainhira amo lulik sira ba husu atu haruka tan povu ba sarani, liurai la interesa tan.

Tuir hakerek na’in, uma kreda diak liu iha Timor mak, uma kreda reino Amameco nian; igreja ne’e fó osan barak ba amo lulik. Maibé, igreja ne’e aat liu hotu. Iha Quinta-feira santa, udan boot, anin fuik, huu lakon tiha odomatan; iha igreja la iha ornamentu, la iha sasan ba misa. Iha fatin balu, iha Timor, igreja la iha didin, la iha odomatan; fahi, bibi no karau tama iha laran halo tiha hanesan luhan ida; iha reinu sira la iha semitériu; iha semitériu karik, la iha kruz ka sinal sarani nian.

Tanba situasan hirak ne’e, “governador” António Hornay haruka surat ba superior dominikanu iha Goa atu haruka ba rai misaun iha Flores no Timor amo lulik ne’eb’e otas boot ona, iha esperiensia no matenek; nia husa atu labele haruka tan amo lulik nurak, tan ba sira ne’e hahalok mesak aat: hatama feto iha uma laran; moris kama-rua, explora família matebian nian hodi kobra osan maka’as, no buka de’it riku-soin.

Hosi Goa, padre Superior dominikanu rona informasaun hirak ne’e; ikus mai, nia foti desizaun haruka ba Timor amo lulik ne’ebé aten brani, naran frei Manuel de Santo António, O.P., hanesan vizitador, iha tinan 1697. Iha tinan 1702, nia sai bispo diocese Malaca nian, hodi hatur rezidensia iha Lifau.

NB/Hakerekek na’in aónimu nia surat: Lifau, 4 de Maio de 1697.

Dom Carlos Filipe Ximenes Belo

Sem comentários:

Enviar um comentário

Nota: só um membro deste blogue pode publicar um comentário.