VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Bloku Unidade Popular Associação Popular Monarquia Timorense Kmanek Haburas Unidade Nasional Timor Oan Partido Esperança da Pátria Partido Socialista de Timor Partido Desenvolvimento Popular Congresso Nacional para a Reconstrução de Timor-Leste Partido Republicano União Democrática Timorense Partido Democrata Cristão Partidu Movimento Libertasaun Povu Maubere Partidu Libertasaun Popular Partido Democratico União Nacional Democrática de Resistência Timorense Partido Unidade Desenvolvimento Democrático Partido Timorense Democratico Frenti-Mudança Partido Social Democrata Centro Ação Social Democrata Timorense Partido do Desenvolvimento Nacional Frente Revolucionaria de Timor-Leste Independente
“O povo de Timor-Leste está reconstruindo com o seu próprio suor, com o seu próprio sangue uma pátria revolucionaria democrática, uma terra livre para gente livre”.

I N T E R F E T
15 Setembro 1999
O Conselho de Segurança da ONU aprova a Resolução n° 1264,
que autoriza a criação de uma força internacional para Timor-Leste (INTERFET)
TIMOR-LESTE



Interview with Fernando Lasama de Araujo: On the road to democracy, where the streets have no name
GOVERNANSA FRETILIN HO PD LEGAL
Konstitusio nalidade Nomeasaun PM
Membru Governu Foun ida-idak nia Profil badak
Impossivel hakerek diskursu ofisial sira iha dalen Tetun?
FFTL "hetan subsidio $1 milliao kada tinan"?
QUEM TUDO QUER TUDO PERDE
Disse-me que depois de ter ouvido de tanta gente tantas histórias...
Antusiasmu Foisae ba Seitor Desportu (Oportunidade, Risku no Vantagen)
Hakarak sai opozisaun diak bele aprende hosi Socrates.
Dekretu Prezidenti Republika!, So iha RDTL deit.

 
 
   

quinta-feira, 5 de fevereiro de 2009

Lei Pensaun Vitalisia, “Imoral” no “Inkonstitusional” (tan sa OMP la akuza AMP?): Hanoin hamutuk ho Vitor Tavares

Martinho G. da Silva Gusmão

Iha ninia artigu “Implementasaun Lei Pensaun Vitalisia Hanesan Insulta Povu, Imoral no Abuza ba Povu Nebee Terus, Susar no Kiak Tanba Funu to’o Ohin Loron” (STL 04/02/2009), Sr. Vitor Tavares tau todan deit ba Dr. Mari Bim Amude Alkatiri ne’ebé sisi ninia direitu adkeridu ba pensaun vitalisia. Maibe, ita tenki hatoo agradesimentu ba Alkatiri. Tan, wainhira nia “sisi tusan” ba Estado/ Governu AMP (inkonstitusional de facto) ne’e mak ita hatene katak, subtilitas aplicandi husi Lei Pensaun Vitalisia (LPV) ne’e todan teb-tebes. Se Alkatiri mak la haruka karta ba Xanana karik, oras ne’e AMP kala fo osan suba-subar deit ba Alkatiri, ka ex-titular seluk karik. Entaun, Dr. Mari Alkatiri tenki hetan aplaus (basa liman) husi ita hotu. Basá, nia iha korajen atu insisti aplikasaun LPV. Ema aten-brani hanesan Alkatiri ne’e satu-satu mak ne’e!!!

Tuir Tavares nia artigu, Alkatiri sai hanesan ema ne’ebé prepra deit kulsaun no sumasu mamar ba sira nia an (caso quo, MA nia familia no aliadu sira). Hau hare kontas final ne’ebé Tavares hatudu, la’os deit isin fulun hamrik, maibe kuaze agonia tiha kedas. Imajina: US$ 612.000.000 ba Mari Alkatir mesak deit!!! Santo sira purgatoriu harohan daet mai ami ba!? Hau la agoenta atu imajina. Kompara took ho OGE 2009, Alkatiri mesak han kedas 85%. Seidauk konta eis titular sira seluk!

Wainhira debate OGE 2009 hala’o namanas hela, ema ida haruka sms mai hau (maibe kansela tiha ninia númeru). Nia dehan nune’e (textual): “bomdia, sr. Profeta falsu oinsa ita bo’ot nia opini/ comentario runggu-rangga kona ba OJE 2009, OR 08 inkonstitusional, gagalnya mcc + korupsao”. Hau la komentariu. Basá, ema ne’ebé haruka sms ne’e tauk ten (no pateta boot ida) atu hatudu nia oin ka identidade. Iha parte seluk, wainhira simu sms ne’e hotu, hau rona kedas iha RTL Ministra Finansas Sra. Emilia Pires dehan katak, MCC rejeita Timor Leste nia proposal basa medidas ne’ebé sira foti mak dadus sira too Juñu 2007 hatudu korupsaun maka’as. No 1º, 2º no 3º Governu Konstitusional (tempu neba FRETILIN mak kaer) la foti aktuasaun ka medidas adekuadu atu bele hapara korupsaun. Se AMP dehan bebeik kona ba “reforma administrativa” hodi kuriji situasaun anterior, entaun sira nia failansu ida mak la kuriji korupsaun husi Fretilin. Depois, AMP mos aumenta tan fali korupsaun. Infelizmente.

Fila ba artigu VT nian! Hau hakerek ona iha diario seluk ho titulu Fenomenologia “imoral” no “inkonstitusional” (Timor Post). Hau hanoin katak iha kazu Lei Pensaun Vitalisia (LPV) ita hasoru situasaun paradoks ida: “Korupsaun Legal” liu husi prinsipiu legitimo moral husi Opozisaun Maioria Parlamentar (OMP) nian ne’ebé mosu bebeik iha debate orsamentu 2008 “Direitu Adkeridu ne’ebé konsagra ona iha Konstituisaun”. Entaun, se hau halo leitura foun ba VT nia artigu, hau hakarak foti problema 2, kona ba problema legal (Konstitusional; prinsipiu objektivu) no problema moral (Konsiensia; prinsipiu subjektivu). So pergunta mak ne’e, tan sa – maski Sociedade Civil no Igreja Katolika akuza ona katak LPV ne’e “imoral” no “inkonstitusional, maibe OMP la akuza AMP? Bele mos kontrariu: tan sa AMP la brani anula tiha lei ida ne’e, maski OMP defende forte liu tan?

Paradoks Konstitusionalidade

Hau la’os jurista. Maibe, nudar novisiu iha filosofia hau hakarak hatudu legal hermeneutic ida. Ne’e katak, hau interpreta konstituisaun/ lei liu husi optika filosofika ida. aspektu ida ne’e abstratu oituan.

Atu hahu, ita lalika kestiona lai ninia montante ne’ebé fulan 1 hakat liu ona USD 10.000.000 (tinan 1 = 120.000.000). Buat ne’ebé bolu ita nia atensaun mak LVP ne’e rasik. Ida uluk, Pensão Mensal Vitalícia dos Deputados e Outras Regalias (Nº. 1/ 2007 de 18 de Janeiro). Lei ida ne’e atu responde ba art. 22º husi lei nº. 5/ 2004 kona ba pensaun ba deputadu sira ne’ebé nia mandatu hotu ona. Sira ne’ebé la sai ona deputadu, fulan-fulan sei simu osan (100%) hanesan deit ho deputadu sira ne’ebé agora aktivu hela. Ida seluk, Decreto do Governo (Nº. 2/ 2007 de 1 de Agosto) hodi reforsa aplikasaun husi Estatuto dos Titulares dos Orgãos de Soberania (Nº. 7/ 2007 de 25 de Julho).

Oinsa mak ita hare katak LPV sira ne’e hanesan “inkonstitusional”? Hare husi filosofia de direito, ita bela fahe ba aspektu 3 (cfr., Georges Burdeau, Droit Constitutionnel et Institutions Politiques, Paris: 1980, pp. 101ff ; hasai mos husi A. Marques Bessa & J. Nogueira Pinto, Introdução à política, Lisboa: 2002, pp. 171- 3):

Inkonstitusionalidade material – mosu wainhira “a lei contém disposições contrarias às expressas na Constituição”. Iha LPV ba deputadu sira, baze Konstitusional mak art. 92º no 95º (n. 2 § j). Bazeia ba ida ne’e mak deputadu sira husi FRETILIN halo lei kona ba sira nia Estatuto rasik. Iha artigu 22º sira ko’alia kona ba pensaun vitalisia. Depois mak sira halo fali lei no. 1/ 2007 atu halo klaru no detailu tan pensaun vitalisia ne’e. Husi artigu konstituisaun nian, ita la hare “espresaun” kona ba lei pensaun vitalisia. Maski nune’e deputadu sira bele halo nafatin lei ida ne’e. Nune’e mos, lei no. 7/ 2007 ninia baze konstituisaun mak art. 92º no 95º (n. 2 § k). Iha artigu 16º no 31º ko’alia kona ba pensaun vitalisia. Bazeia ba ida ne’e mak Governu FRETILIN (liu husi PM Estanislau da Silva) aprova dekretu lei (tan la bele ona halo lei liu husi PN). Dala ida tan, maski konstituisaun la temi liafuan ida (expressas) kona ba lei pensaun vitalisia, maibe PN no Governu halo ona LPV. Too iha ne’e ita seidauk bele hateten katak materia LPV ne’e konta ona konstituisaun. Seidauk!

Inkonstitusionalidade formal – mosu wainhira dehan katak, “a lei pode ser publicada sem seguir os trâmites processuais exigidos pela norma constitucional ou sem revestir a forma que ela indica”. Katak, LPV bele publika tiha ona, maibe la tuir “prosesu” no “norma” ne’ebé konstituisaun hatudu. Iha ne’e konfuzaun hahu mosu! Husi aspektu “prosesual” ita hare deit ninia data/ loron/ fulan no tinan: Janeiru 2007, Julho 2007 no Agostu 2007. Iha momentu neba, ema hotu konsentra ba eleisaun presidensial no eleisaun jeral. Tan ne’e, ema la hare ba prosesu legislasaun seluk. Aproveita situasaun ida ne’e (sa tan mosu violensia barak tan formasaun governu AMP), entaun PN no Governu FRETILIN halo lalais LPV. Iha bahasa Indonesia karik dehan povu tomak “kecolongan” no la konsege detekta “naok ten” sira tama iha uma fukun. Husi aspektu “norma”, ita bele hare “norma objektivu” (lei positivu) no “norma subjektivu” (konsiensia moral). Ita bele simu norma objektivu, deputadu sira no governu halo tuir buat ne’ebé konstituisaun (art. 92º no 95º no. 2/ j, k) hatudu. Maibe husi aspktu norma konsiensia moral, ita la bele imajina regalias ne’ebé ex-titulares hetan. Liu-liu hare ba art. 18º (= art. 4º ba ex-deputadu sira) ita bele hatoo pergunta:

a) Residencia condigna – ka uma diak no furak ida ho sasan kumpletu kedas, no luxu. Ita sei bele tolera no simu ida ne’e. Maibe, se tinan-tinan ita fo uma ba ex-titular entaun tinan 25 mai ne’e, uma luxu hira mak estadu fahe gratis ba ex-titular (no ex-deputadu ho ex-ministru no vice-ministru + sekretariu estadu sira??)

b) Kareta ida husi estado ba ninia servisu pessoal, hamutuk ho kondutor no mina! Ita nia pergunta: “servisu pessoal” ne’e atu halo saida no fo saida ba estado no povu?

c) Direito a protecção pessoal e residensial, ka direitu atu hetan ema ne’ebé hein nia no hein nia uma. Ema nain hira mak hein Alkatiri no nia uma (seidauk sura eis-titular seluk)? Osan hira mak sei uza atu selu seguransa no hein uma nina?

d) Direito atu hetan kantor hodi halo servisu, hamutuk ho telefone 2, internet, telemovel (klaru, enxe pulsa tan?), sekretaria pribadi no assesor pribadi, ne’ebé servisu ba nia haruka husi funsionariu ka ajensia seluk estado nian. Pergunta: servisu be nia halo ne’e ba estado no povu nia diak ka atu sokar lia tun sae, hamosu konflitu no instabilidade? Maibe, uza fali fasilidade estadu nian? Too ohin loron, servisu ex-titular nian halo saida?

e) Direito atu halo viajen ofisial hanesan ho PR, PM ka Pres. PN too loron 15 atu halo servisu ofisial ne’ebé sai husi nia residensia (katak: sai husi Dili). Dala ida tan “missões oficiais” ne’e Alkatiri ba halo saida deit? Reuniaun partidu nian atu insulta no hatoo informasaun falsu hodi provoka povu nia tensaun, maibe Estado tenki selu? Tan sa mak servisu ba ninia “partidu” sai hanesan “missões oficiais”, maibe partidu seluk sai deit hanesan “manduku”?

f) Halo viajen ida ba rai liur (Internasional) hamutuk ho ema 2, iha “classe adequada” ho funsaun hanesan titular ida. Ne’e atu hatudu katak, se Alkatiri ba rai liur entaun Estado tenki selu hanesan selu ba PR, PM no Pres. PN! Liafuan “classe adequada” ne’e bele kelas ekonomi bele mos kelas bisnis bele mos kelas eksekutif. Maibe, dala ida tan: ba viajen iha liur atu “fase roupa foer” depois husu fali estado mak tenki fo osan???

g) Direito a livre-transito no passaporte diplomatiku ba nian an no nia familia sira (fen oan). Ida ne’e ex-deputadu mos hetan. Duranti ne’e OMP hakilar AMP kona ba nepotismu to??? Be ida ne’e oinsa los ... fen-oan goza nafatin sasan estado nian? Entaun, ita halo lei ba “nepotisme legal”, atu nune’e OMP bele hakilar ema seluk maibe sira rasik ho sira nia familia “lenggang kangkung” deit.

h) Direitu atu halo tratamentu iha rai laran no rai liur. Ida ne’e ex-deputadu mos hetan!!! Ne’e la buat ida, tan AMP mos halo ba povu bainlet atu ba Bali, Surabaya no Darwin. Klase la hanesan. Maibe, ex-titular ida moras todan, ita/ estadu iha obrigasaun moral atu fo tratamentu diak nian.

i) Direitu atu hatama kareta ba ninia an rasik (tinan 5 dala ida), no sasan sira tomak atu halo uma maibe la selu taxa. Regalia sira ne’e ex-deputadu mos hetan! Agora problema foun ba ex-titular mak ne’e: Estado fo ona uma diak no fasilidade tomak, inklui selu ema ne’ebé servisu! Tan sa mak tenki hatama sasan no kareta hodi la selu taxa? Uma ida uluk (iha numeru a) ba saida, uma ida ne’e fali ba saida nian? Depois la selu taxa!!!

j) Direitu ba nia an rasik no familia atu tur iha fatin diak ho honra wainhira iha serimonia ka festa estadu nian. La buat ida. Bai-bain jovens sira dehan “festa ita hotu nian, kabun ida-idak nian”.

Ne’e seidauk kalkula osan hira mak sei hasai ba deit Ba’i-no ho Nonoi ex-malae-boot sira ne’ebé la servisu ona (ka iha bisnis ketak), maibe xupa no susu nafatin povu too krekas hanesan fahi. Maibe, wainhira Alkatiri sura tiha ninia osan (hau refere ba artigu Tavares nian), rezultadu fulan 1 too kedas USD 10.000.000 resin ... filha da mãe, riku matak kedas!!! Hau mos araska atu imajina. Agora, ita la hatene “ex-titular” ne’e ninia funsaun saida lerek: “funsionariu publiku”, “funsionariu partidu”, “funsionariu silencio” ka “funsionariu bolsa mahar” nian?

Inkonstitusional orgânica – dehan katak, “a lei pode ser emitida por um órgão que a Constituição não considera competente”. Ne’e katak, iha órgaun balun ne’ebé foti an sai tiha super-power maibe afinal sira la’os “soberania konstitusional”. Caso quo, CCF! La’os ona segredu, katak, buat ne’ebé hakotu iha PN ne’e hanesan “prosesu ritual” deit ba buat ne’ebé formalmente desidi tiha ona iha CCF (Fatuhada) ka iha uma/ familia ida (Farol). Deputadu sira hatene deit “foti liman”, maibe sira mos la kumprende buat ida. Ba hau, LPV no lei pensaun ba eis titular sira ne’e “emitida” ona iha CCF depois haruka deputadu sira “foti liman” iha PN. Tan ne’e uluk hau dehan PN ne’e hanesan “ayam potong”. Agora mak deputadu sira husi OMP dehan AMP hatene deit “foti liman”, “la iha kompetensia”, “la iha matan”, “la iha sentimentu”, “tilun diuk”, “matan delek”, no liafuan infantil seluk tan. Maibe, uluk mos hanesan deit. Ita uza fali kazu OGE 2009 atu lori ba TR. Maibe, kompetensia ida ne’e agora Dr. Mari Alkatiri mak halo ... nia mak lori ba konsulta ho PR, depois haruka Lu-Olo mak halo “ameasa” atu lori ba TR no sei “abandona PN”. De resto, deputadu sira ne’ebé tuir forma tuir Konstituisaun – inklui OMP – hanesan fali la iha “Kompetensia”. Entaun movimentu ne’ebé Mari Alkatiri halo atu deklara “inkonstitusional ba OGE 2009” no “abandona PN” la’os mai husi OMP (ne’ebé iha dignidade rasik), maibe “uma pessoa que a Constituição não considera competente”. Tuir hau nia hanoin, OMP agora ne’e “ayam potong” duni (menus Cipriana Pereira, no iha kazu balun Ana Pessoa karik).

Konkluzaun: paradoks sai kroat liu wainhira AMP hakarak selu osan hirak ne’e ba Alkatiri. Iha interogasaun ki’ik oan ida, maibe fundamental tebes, Sr. Dr. Mari Alkatiri nudar ex-PM haruka karta ba Sr. Kay Rala Xanana Gusmão nudar PM IV Governu Konstitusional, ka, ba Sua Excelencia Senhor Xanana Gusmão PM inkonstitusional de facto? Se Alkatiri haruka karta ba Xanana Gusmão deit maibe nafatin ho liafuan “inkonstitusional de facto”, entaun cuek tiha deit; lalika sibuk. Tan Xanana Gusmão la iha legalidade (konstitusional) atu hasai osan! Maibe, se Dr. Alkatiri haruka karta ba PM Kay Rala Xanana Gusmão, lider aktual-real husi IV Governu Konstitusional, entaun OMP tata-rai ona! Basá, iha ona tentativa 2 husi Alkatiri atu halo politics of recognition: fohin lalais ne’e halo manobra atu xefia negosiasaun ba tasi Timor GSR, no agora sisi osan pensaun vitalisia. Halo nusa ba mos, OMP kontinua halo politika konfliktual ho AMP iha publiku nia oin ... maibe, iha kotuk OMP no AMP fahe malu osan fuiiikkkk!!!! Eh ita bele hanoin seluk: se OMP fa’an ninia politika, AMP sosa ho osan hira deit. Maibe, infelizmente, AMP naok povu nia osan fo fali ba OMP. Entaun, A. Marques Bessa & J. Nogueira Pinto hakerek tan, “Os governantes foram os primeiros a fazer tábua rasa dos princípios constitucionais, consciente e decididamente. Muitos dirigentes consideram mais oportuno e vantajoso manter práticas inconstitucionais que observar escrupulosamente um parágrafo molesto. Oportunismo político, manipulação, carência de mentalidade jurídica, tudo se conjugou para transformar a Lei Fundamental num texto formal, propagandístico, cujos artigos ficam bem em cartazes comemorativos” (p. 173).

Paradoks Moralidade

Pergunta ne’ebé hau hakarak foti hasoru Sr. Vitor Tavares mak ne’e: Tan sa OMP la ataka AMP kona ba lei pensaun ba eis titular sira ne’ebé halo bokur deit manduku sira? Husi deputadu OMP nian, hau respeita diak tebes Dra. Ana Pessoa (no Cipriana Pereira). Maibe, hau lakon oituan apresiasaun ba Dra. Ana Pessoa. Nia deklara, “Hau hanoin ita tenki rona malu hodi hadia estadu Timor Leste, maibe se la rona malu maka estadu ne’e sei nafatin fraku, pior liu ita so bele habokur deit makina estadu, entertantu povu kontinua krekas” (STL 04/02/2009, p. 14). Minha Senhora: osan ba eis titular ne’e mos fo influensia ba makina estadu ka lae? Nia kontinua dehan, “se ita kompara aparelo de estadu hanesan comboyu ida, la forte maibe ita tula nafatin todan ba nia leten mak nia la bele la’o”. Alkatiri nia lista ne’e “todan” ka lae? Ne’e seidauk sura Lu-Olo no deputadu seluk no ministru seluk nia lista!!! (Konta deit 88 + 65 ba deputadu sira, depois ministru, vice ministru no sekretariu estadu sira, depois imajina tan too tinan 25 mai!!!)
Agora, hau hakarak halo kroat liu tan liafuan “imoral” ne’ebé Tavares hakerek ona! Hanesan mos hanoin ne’ebé Dom Basilio do Nascimento foti iha intervista ho diario seluk. Ho deskrisaun no kalkulasaun osan ne’ebé Tavares halo, hau hanoin kedas espresaun moral husi fílosofo hanesan Friedrich Nietzsche [1844-1900]. Nia sai famozu iha kampu filosofia etika, tan hatudu “moralismo” iha politika nain sira nia let. Liafuan “moralismo” dehan katak, ita hanoin halo buat diak liu husi dalan ne’ebé bele foer no at. Ezemplu, iha publiku – sa tan wainhira kamera TVTL se ba sira nia oin – ukun nain sira hahu ko’alia kona ba “povu nia moris, povu nia ki’ak, povu nia terus”. Maibe, eskandalu boot hanesan LPV ne’e mosu iha TVTL, entaun sira hotu rungu-ranga, ulun tun ain sae! Ita bele nota, katak, OMP no AMP ko’alia maibe sira nia liafuan “la seguru” (= tidak percaya diri). Tan sa sira la ‘pede’? Tan “moralismo” ne’e duni. Sira hatene katak, LPV ne’e la diak maibe sira mos hare katak sei fo benefisiu ba future. Entaun, OMP no AMP halo teatru dramatiku ida: halo finji diskuti, maibe depois TVTL taka tiha mak ita ko’alia iha kotuk deit!

Nietzshce ninia tesis mak hanesan ne’e: “The judgment ‘good’ did not originate with those to whom ‘goodness’ was shown! Rather it was ‘the good’ themselves, that is to say, the noble, powerful, high-stationed and high-minded, who felt and established themselves and their action as good, that is, of the first rank, in contradiction to all the low, low-minded, common and plebian” (husi nia livru ida: Genealogy of Morals I.2.2).

Mosu ideia 2 ne’ebé ataka malu maka’as tebes! Ida uluk, valor etika ne’ebé hatudu “the first rank”, ne’ebé Nietzsche refere ba “the morality of aristocracy” (moralidade liu-rai sira/ patraun no matenek sira nian) Ida seluk, valor etika ba ema ne’ebé nia kunsidera “the low, low-minded, common and plebian”, ne’ebé nia hatudu ba “the morality of slavery” (moral atan sira nian).
Se ita aplika ba Tavares nia artigu, entaun nia sai nune’e: lei pensaun vitalisia ne’e mai husi moral aristokrasia nian, husi ranking pertama nian, primeira klasse sira nian, ba familia nian. Ba sira, lei tenki fo vantajen, fo buat diak (the good). Maibe, valor kona ba buat diak ne’e (the goodness) tenki bazeia ba sira nia klasse (nobre), prepotente (powerful), hetan fatin as deit (ba nian an no ba familia rasik), hanoin semo deit, no tenki asegura sira nia pozisaun no aksaun. Se ita hare art. 18º (no art. 4º ba ex-deputadu) husi LPV, entaun ida ne’e kontempla (hatudu) kedas Dr. Mari Alkatiri ho nia maluk sira ne’ebé fotokopi lolos valor-moral Nietzsche nian. (Iha istoria mundu nian ita bele sura netik Adolf Hitler, Mao Tse Tung no Lenin-Stalin)

Nietzsche mos kunsidera katak, valor sira hanesan solidariedade, hadomi malu, hadame malu, amizade, moris tuir dalan ba lalehan (valor relijiaun no tradisaun; liu-liu Judeo-Kristaun), ne’e serve deit ba “atan sira”. Ita rona ona liafuan famozu husi Alkatiri, katak, hanesan “fo han fali fahi krekas sira”, “la hatene kaixa ka kaixote”, “fuk naruk la fase”, “manduku”, “beik ten”, “kuda buru”, “sarjana supermi”, “padre balun halo politika maibe kakutak la iha, (Alkatiri nia estudante sira dehan “profeta falsu”), nst. Liafuan sira ne’e halo Nietzsche haksolok tebes, tan nia hetan alunu diak ida iha Timor Leste ne’ebé halo tuir lolos nia ensinamentu/ pensamentu kona ba “the low” (fahi krekas, manduku), “low-minded” (beik ten, kakutak la iha, sarjana supermi), “common” (povu ailebo???), no “plebian” (povu maubere???).

Moraliade “patraun vs atan” ne’e moris bebeik iha paradox no konflitu nia laran. Tan ne’e mak Nietzsche dehan katak, tuir lolos ita sira ne’e hotu moris iha ressentiment nia laran. Patraun sira sei hanehan nafatin atan sira; atan sira sei frustradu no laran moras no laran kanek hare patraun sira. Wainhira “atan” sira sei serve, entaun “patraun” uza nafatin; wainhira “patraun” dehan la vale ona, entaun “atan” sira hela deit nudar fahi krekas ida, fuk naruk la fase, beik ten, kakutak la iha, kaixote (mamuk), nst.

Se ita hare husi pespektiva ida ne’e, entaun LPV la’os “imoral”. Liafuan “imoral” ne’ebé Dom Basilio no Sr. Tavares uza ne’e, tan sira 2 mai husi relijiaun Kristaun no tradisaun Timor Leste nian. Maibe, Alkatiri ho nia maluk sira mai husi “mundu seluk”, “ambiente seluk”, mentalidade no filosofia ketak ida. Ba Alkatiri cs, valor moral importante liu mak hanesan Nietzsche dehan “der Wille zur Macht” (Ingles dehan: the will to power; Portugues dehan a sede pelo poder). Katak, ita hotu “mehi/ hamlaha/ hamrok nafatin atu kaer ukun”. Ka, tuir Alkatiri nia liafuan Iha ne’e hau mak manda, pontu no virgula ida mos sei la muda! Maski, Alkatiri kaer kargu hanesan Sekjer FRETILIN no ex-PM deit, maibe nia mak manda OMP, manda PN no liu-liu kondutor politika ba PR Dr. Ramos Horta. Alkatiri mak konstituisaun no lei no regulamentu. Alkatiri mak “L’etat c’est moi” (le = leta semoa), katak, estado mak hau (eh, hau mak estadu). Liafuan ne’e la’os husi Napoleon Bonaparte, maibe husi Louis XIV. Tuir Nietzsche, atu bele kaer metin ukun, atu bele manda nafatin too tinan 50, entaun Alkatiri tenki uza dalan hotu-hotu. A lias, ita tenki hola dalan “imoral”. Entaun, ba Nietzsche “imoral” ne’e mak “moral”. Ita tenki iha “ressentiment” atu sama ema seluk, atu hanehan ema seluk, atu han mate ema seluk. Se ita hanoin deit hadomi malu, tulun malu, hadame malu, amizade, toleransia, solidariedade (hanesan Bispo, Padre, Patriota, Veteranu, F-FDTL, PNTL, juiz no povu-sarani sira fiar) ... entaun ita sai “atan” ba ema seluk.

Entaun, konkluzaun, paradoks moral mak ne’e: buat ne’ebé tradisaun no relijiaun iha Timor Leste dehan “moral”, Nietzsche dehan “imoral”. Buat ne’ebé Nietzsche dehan “imoral”, ne’e mak ita hotu iha Timor Leste fiar fali dehan “moral”. Agora mak hau bele kumprende, ninia alunu Dr. Mari Alkatiri dala ida dehan, katak, tradisaun no relijiaun iha Timor Leste sai hanesan obstakulu atu dezenvolve Estado de direito democrático.
.
Liafuan ikus

Tuir hau nia hanoin, LPV hatudu katak ita halo lei kolonialista ka imperialista sira nian. Hau rona debate kona ba OGE 2009, deputadu Arsenio Bano husi OMP dehan bebeik ba AMP atu hare film Robin Hood. Se deputadu ne’e mak “sutradara”, entaun kala Robin Hood versaun OMP nian, ita bele nonton rame-rame. Ekzaktamente halo korupsaun legal.

Atu hatan ba Vitor Tavares, hau hanoin katak wainhira OMP la ataka AMP kona ba LPV entaun sira sei moris iha damen nia laran. Hau mos fiar katak, wainhira AMP atu halo revizaun ba LPV sira sei hasoru “conflict of interest”. Entaun, LPV sei la halo mudansa substansial sa tan “revoga” (tuir Vitor Tavares nia hanoin). Hau hanoin OMP no AMP sei too iha “konsensu” atu kontinua halo “pensaun vitalisia” no sei la halo “subsidiu temporariu”. Subsidiu temporariu, katak, wainhira sira nia mandatu hotu entaun Estado fo netik osan ho montante ida ne’e modestu no honestu hodi hala’o moris foun, ka “reintegrasaun komunitaria”. Maibe, se ex-titular sira simu osan barak hanesan ne’e entaun sira nunka fila ba povu, maibe hela hela extra-comunitaria no elite ida.

Fila fali ba deputadu sira ne’ebé gosta ko’alia povu nia terus, povu nia ki’ak no susar!!! Hau hanoin diak liu sira hapara ona violensia kontra povu nia sentimentu no konsiensia. Hau fo ezemplu ki’ik ida: wainhira ko’alia kona ba vensimentu ba PR, PM no Pres. PN ba deputadu no membru governu, sira hotu hakilar malu hodi povu nia naran. Nietzsche dehan katak halo filosofia tenki brani halo Umwerte aller Werte (bhs. Jerman): halo norma/ valor too ulun tun ain sae, too bulak tiha. Hau halo took deputadu sira, liu-liu bloku OMP ho sujestaun konkretu: simu deit USD 20 hanesan katuas ferik sira, lalika simu USD 450 sa tan USD 2000 too 3000. Nune’e mos ex-titular sira simu deit USD 20 hodi apaga tiha LPV. Maibe, hakilar tiha AMP no haruka sira nonton film Robin Hood versaun OMP nian, depois simu nafatin USD 450 entaun ne’e hanesan “naok ten hakilar ema seluk naok ten” (maling teriak maling). Felizmente, versaun orijinal husi Robin Hood la halo ida ne’e, la hatene versaun OMP nian oinsa?

*)
Direitor CJP Diocese Baucau, dosente iha filosofia etika & politika no ateismu kontemporanea iha Seminario Maior S. Pedro & S. Paulo, Fatumeta no UNTL no artigo exklusifo ba Forum Haksesuk (http://www.forum-haksesuk.blogspot.com/)!

2 comentários:

  1. Esta matéria é uma matéria de discussão pública, um assunto nacional, um problema de grande dimensão, uma prova de altíssimo nível de equidade dos órgãos de estado como PN e Governos. Um teste forte e envergadura aos órgãos competentes do estado em prol da defesa do estado de direito democrático, da justiça social, do direito do povo de uma vida condigna, harmonia, paz e sossego das populações. É também um caso demasiado sensível para sermos insensíveis dele ou despercebidos ou, é também gritante demais para estarmos indiferentes. O que está em causa é a credibilidade das instituições do estado, a própria credibilidade das leis nacionais. Está em jogo, acima de tudo é a justiça social, a dignidade do povo como pessoa humana perante o primado lei, o direito de igualdade de viver condigna, o direito de igualdade na distribuição e obtenção de riquezas da nação. E o futuro do estado de direito, liberdade e garantias é hoje posto em prova através desta prática cegamente introduzir a dilemática LPV. O dia de hoje é o juiz de amanhã, se no futuro haverá ou não a justiça depende dos governantes de hoje, mas haverá no entanto, um resultado certo no futuro e esse resultado depende da decisão de hoje. Se há uma boa prática trará certamente um bom resultado e glorificarão os que passarem pelas provas, mas se falhar nas tomadas de posições, estes terão de pagar com um elevado preço no futuro e consequentemente abrirá uma nova precedente como uma auto-estrada para acelerar muitas outras práticas idênticas no futuro, de geração para geração que poderá conduzir o estado RDTL a um paraíso para ex-titulares dos cargos públicos, construído sobre a pobreza e sofrimento do Povo de Timor-Leste.

    Victor Tavares
    Editor FH

    ResponderEliminar

Nota: só um membro deste blogue pode publicar um comentário.